ប្រធានទីភ្នាក់ងារថាមពលអាតូមិកអន្តរជាតិ (IAEA) របស់អង្គការសហប្រជាជាតិ បានប្រកាស «កិច្ចប្រជុំបន្ទាន់» នៅទីស្នាក់ការកណ្តាលរបស់អង្គការនៅទីក្រុងវីយែននៅថ្ងៃចន្ទ ទី២៣ មិថុនានេះ បន្ទាប់ពីសហរដ្ឋអាមេរិក បានវាយប្រហាររោងចក្រនុយក្លេអ៊ែរអ៊ីរ៉ង់។

បន្ទាប់ពីប្រធានាធិបតីអាមេរិក លោក Donald Trump បានសម្រេចចិត្តចូលរួមយុទ្ធនាការរបស់អ៊ីស្រាអែលប្រឆាំងកម្មវិធីអាតូមិករបស់ទីក្រុងតេអេរ៉ង់ ដែលសហរដ្ឋអាមេរិកកាលពីថ្ងៃអាទិត្យបានទម្លាក់គ្រាប់បែកលើរោងចក្រនុយក្លេអ៊ែរចំនួនបីកន្លែងក្នុងប្រទេសអ៊ីរ៉ង់ រួមទាំងរោងចក្រចម្រាញ់សារធាតុអ៊ុយរ៉ានីញ៉ូមនៅតំបន់ Fordo ស្ថិតក្នុងជម្រៅ៩០ម៉ែត្រ។

លោក Rafael Grossi បានសរសេរនៅលើបណ្តាញ X កាលពីថ្ងៃអាទិត្យថា «ដោយគិតពីស្ថានភាពបន្ទាន់នៅក្នុងប្រទេសអ៊ីរ៉ង់ ខ្ញុំកោះប្រជុំបន្ទាន់នៃក្រុមប្រឹក្សានៅថ្ងៃចន្ទនេះ»។

លោក Trump បាននិយាយថា ការវាយប្រហារតាមអាកាសរបស់សហរដ្ឋអាមេរិក ដែលលោកបាននិយាយថា មានគោលបំណងរារាំងអ៊ីរ៉ង់ពីការទទួលបានគ្រាប់បែកនុយក្លេអ៊ែរ ទោះបីជាទីក្រុងតេអេរ៉ង់បដិសេធយ៉ាងម៉ឺងម៉ាត់ថាគ្មានបំណងធ្វើដូច្នេះក៏ដោយ «ដោយបានបំផ្លាញទាំងស្រុង» ទីតាំងបរមាណូសំខាន់ៗរបស់សាធារណរដ្ឋអ៊ីស្លាមមួយនេះ។ ថ្លែងទៅកាន់ទូរទស្សន៍ CNN របស់អាមេរិក លោក Grossi បាននិយាយថា មានសញ្ញាច្បាស់លាស់នៃការវាយប្រហារនៅតំបន់ Fordo ដោយដកស្រង់រូបភាពពីផ្កាយរណប និងការស្វែងយល់របស់ទីភ្នាក់ងារ IAEA អំពីទីតាំងនៅក្រោមដី ដែលក្រុមអធិការកិច្ចអង្គការសហប្រជាជាតិតែងតែទៅពិនិត្យជាទៀងទាត់។ ទោះជាយ៉ាងណា លោកនិយាយថា វាលឿនពេកក្នុងការវិនិច្ឆ័យទំហំនៃការខូចខាត។ លោកបាននិយាយបន្ថែមថា ការវាយប្រហាររបស់អ៊ីស្រាអែល និងសហរដ្ឋអាមេរិក បានបំផ្លាញយ៉ាងច្បាស់លាស់នូវផ្នែកខាងលើដី ហើយលោកសង្ឃឹមថា ក្រុមអធិការកិច្ចរបស់ទីភ្នាក់ងារ IAEA អាចត្រឡប់ទៅទីតាំង Fordo វិញឱ្យបានឆាប់តាមដែលអាចធ្វើទៅបាន ដើម្បីវាយតម្លៃពីទំហំនៃការខូចខាត។