ធនាគារវិនិយោគពហុជាតិរបស់សហរដ្ឋអាមេរិក Goldman Sachs ដ៏ល្បីល្បាញបានព្រមានពីហានិភ័យធ្ងន់ធ្ងរចំពោះការផ្គត់ផ្គង់ថាមពលសកល ស្របពេលក្តីបារម្ភលើការរំខានដែលអាចកើតមាននៅច្រកសមុទ្រ Hormuz ដោយសារស្ថានការណ៍ជម្លោះនៅអ៊ីរ៉ង់ ដែលនឹងនាំឱ្យមានការហក់ឡើងគួរឱ្យកត់សម្គាល់នៃតម្លៃប្រេង និងឧស្ម័នធម្មជាតិ។

ធនាគារនេះប៉ាន់ប្រមាណថា ប្រេងឆៅប្រភេទ Brent អាចឡើងដល់កម្រិត ១១០ដុល្លារក្នុងមួយបារ៉ែល ប្រសិនបើប្រេងហូរតាមផ្លូវទឹកដ៏សំខាន់នេះត្រូវកាត់បន្ថយពាក់កណ្តាលសម្រាប់រយៈពេល ១ខែ ហើយក៏អាចនៅតែស្ថិតក្នុងតម្លៃនេះ ប្រសិនបើធ្លាក់ចុះ ១០% សម្រាប់ពេល ១១ខែបន្ទាប់។

ធនាគារនិយាយក្នុងកំណត់ត្រាមួយថា ដល់ពេលនោះ ប្រេងនឹងមានកម្រិតមធ្យម ដោយតម្លៃ Brent ជាមធ្យមប្រហែល ៩៥ដុល្លារក្នុងមួយបារ៉ែលក្នុងត្រីមាសទី៤ ឆ្នាំ២០២៥។ តម្លៃប្រេងហក់ឡើងយ៉ាងខ្លាំងក្នុងថ្ងៃចន្ទ (២៣ មិថុនា) នេះ ដល់កម្រិតខ្ពស់បំផុតចាប់តាំងពីខែមករាមក បន្ទាប់ពីទីក្រុងវ៉ាស៊ីនតោន បានចូលរួមជាមួយអ៊ីស្រាអែល កាលពីចុងសប្តាហ៍ ទម្លាក់គ្រាប់បែកលើទីតាំងនុយក្លេអ៊ែររបស់អ៊ីរ៉ង់។

Goldman Sachs គូសបញ្ជាក់ថា ទោះបីជាការបម្លែងសាច់ប្រាក់ងាយស្រួលនៅមានកម្រិតក៏ដោយ ក៏ឥឡូវនេះការព្យាករទីផ្សារបានឆ្លុះបញ្ចាំងពីលទ្ធភាព ៥២% ដែលថាអ៊ីរ៉ង់ បិទច្រកសមុទ្រ Hormuz ក្នុងឆ្នាំ២០២៥ ដោយដកស្រង់ទិន្នន័យពីទីផ្សារភ្នាល់ Polymarket។

ទូរទស្សន៍ Press TV អ៊ីរ៉ង់ និយាយនៅថ្ងៃអាទិត្យថា ក្រុមប្រឹក្សាសន្តិសុខជាតិជាន់ខ្ពស់អ៊ីរ៉ង់ ត្រូវតែធ្វើការសម្រេចចុងក្រោយថាតើត្រូវបិទច្រកសមុទ្រ Hormuz ឬទេ បន្ទាប់ពីការវាយឆ្មក់ផ្លូវអាកាសរបស់អាមេរិក បន្ទាប់ពីមានសេចក្ដីរាយការណ៍ថា សភាអ៊ីរ៉ង់បានគាំទ្រវិធានការនេះរួចទៅហើយ៕