មនុស្សរាប់សិបលាននាក់នៅទូទាំងភាគខាងលិចប៉ែកកណ្ដាល និងតំបន់ខាងកើត របស់សហរដ្ឋអាមេរិក បានស៊ូទ្រាំនឹងសីតុណ្ហភាពក្តៅដ៏គ្រោះថ្នាក់ជាថ្មីម្តងទៀតកាលពីថ្ងៃអាទិត្យ (២២ មិថុនា) ខណៈរលកកម្ដៅដ៏រីករាលដាលនៃខែមិថុនា ដែលគ្របដណ្តប់ផ្នែកភាគច្រើននៃសហរដ្ឋអាមេរិក ត្រូវបានរំពឹងថានឹងបន្តដំណើរការយ៉ាងគ្រោះថ្នាក់នៅក្នុងសប្តាហ៍នេះ។

ភាគឦសានភាគច្រើនរបស់អាមេរិក ចាប់ពីរដ្ឋ Minnesota ដល់ Maine គឺស្ថិតនៅក្រោមការជូនដំណឹងប្រឹក្សាកម្ដៅប្រភេទផ្សេងគ្នាជាច្រើន។ សេវាអាកាសធាតុជាតិនិយាយថា ផ្នែកនៃរដ្ឋ Arkansas រដ្ឋ Tennessee រដ្ឋ Louisiana និង Mississippi ក៏ស្ថិតក្រោមការជូនដំណឹងកម្ដៅដូចគ្នានេះដែរ។ ការិយាល័យសេវាអាកាសធាតុនៅទូទាំងតំបន់ បានព្រមានពីអាកាសធាតុក្តៅខ្លាំង និងជួនកាលអាចគំរាមកំហែងដល់អាយុជីវិត រហូតដល់ថ្ងៃពុធ (២៥ មិថុនា) ពាក់កណ្ដាលសប្ដាហ៍នេះ។

អ្នកឧតុនិយមនិយាយថា បាតុភូតមួយឈ្មោះថា ដូមកំដៅ ពោលគឺជាតំបន់អាកាសធាតុដ៏ធំមានសម្ពាធខ្ពស់នៅក្នុងបរិយាកាសផ្នែកខាងលើដែលហ៊ុមកម្ដៅ និងសំណើមទុក គឺជាមូលហេតុដែលនាំឱ្យមានសីតុណ្ហភាពខ្ពស់ខ្លាំង។ អភិបាលក្រុងញូវយ៉ក លោកស្រី Kathy Hochul បានប្រកាសគ្រាអាសន្នក្នុង ៣២តំបន់ ដោយសារព្យុះខ្លាំង និងការព្យាករពីរលកកម្ដៅ។

ងៃអាទិត្យកាលពីចុងសប្ដាហ៍ បានក្លាយជាថ្ងៃទីពីរជាប់គ្នានៃកម្ដៅខ្លាំងក្លាទូទាំងឆ្នេរភាគខាងលិច និងខាងកើតរបស់សហរដ្ឋអាមេរិក។ សន្ទស្សន៍កម្ដៅកាលពីថ្ងៃអាទិត្យ បានឡើងដល់ ៣៩,៤អង្សាសេ នៅទីក្រុង Chicago និង ៣៨,៣អង្សាសេ នៅថ្ងៃសៅរ៍ក្នុងក្រុង Madison រដ្ឋ Wisconsin ដែលប្រែក្លាយព្រឹត្តិការណ៍ជិះកង់អាក្រាតកាយប្រចាំឆ្នាំរបស់ទីក្រុងនោះ ឱ្យទៅជាថ្ងៃដែលពោលពេញដោយញើស និងខកចិត្តសម្រាប់អ្នកចូលរួម៕