ភាគហ៊ុនសកលបានធ្លាក់ថ្លៃ ហើយតម្លៃប្រេងបានកើនឡើងនៅក្នុងការជួញដូរក្នុងថ្ងៃចន្ទ (២៣ មិថុនា) នេះក្នុងទីផ្សារពិភពលោក ជាពិសេសអាស៊ី ដែលឆ្លុះបញ្ចាំងពីក្ដីបារម្ភរបស់វិនិយោគិន ជុំវិញបញ្ហាសេដ្ឋកិច្ចដោយសារតែការវាយប្រហាររបស់សហរដ្ឋអាមេរិក ទៅលើរោងចក្រនុយក្លេអ៊ែរអ៊ីរ៉ង់ចំនួន ៣កន្លែង កាលពីចុងសប្តាហ៍។

ហ៊ុន S&P 500 របស់អាមេរិក បានធ្លាក់ចុះប្រហែល ០,៣% នៅពេលទីផ្សារបើកលក្នុងទីក្រុងញូវយ៉ក។ តម្លៃហ៊ុនប្រេងឆៅរបស់សហរដ្ឋអាមេរិក WTI កើនបានប្រហែល ៣% ហើយមាស ដែលជាទ្រព្យសម្បត្តិសុវត្ថិភាព បានកើនឡើង ខណៈផ្សារហ៊ុនអឺរ៉ុបក៏ស្រពេចស្រពិល។

ទីផ្សារនៅអាស៊ី ដែលបើកដំបូងគេបន្ទាប់ពីការវាយប្រហារនៅអ៊ីរ៉ង់ បានធ្លាក់ចុះបន្តិច ដោយភាគហ៊ុននៅកោះតៃវ៉ាន់ ធ្លាក់ជាង ១% ហើយសន្ទស្សន៍នៅជប៉ុន ក្រុងហុងកុង និងកូរ៉េខាងត្បូង ក៏មើលឃើញការថយចុះដូចៗគ្នា។

ពាណិជ្ជករកំពុងរង់ចាំមើលការចង្អុលបង្ហាញកាន់តែច្បាស់បន្ថែមទៀត ថាតើនឹងមានការកើនឡើងធំប៉ុណ្ណោះនៅក្នុងជម្លោះមជ្ឈិមបូព៌ា - ជាពិសេសវិធានការណាមួយរបស់អ៊ីរ៉ង់ ក្នុងរំខានការដឹកជញ្ជូនតាមច្រកសមុទ្រ Hormuz ដ៏សំខាន់។ យ៉ាងណាក៏ដោយ អ្នកវិភាគមួយចំនួនរំពឹងថា ផលប៉ះពាល់ពីការវាយប្រហាររបស់សហរដ្ឋអាមេរិកនេះនឹងមានរយៈពេលខ្លីប៉ុណ្ណោះ៕