នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអាទិត្យ (២២ មិថុនា) ថា ប្រទេសអ៊ីស្រាអែល គឺជិតនឹងសម្រេចបាននូវគោលដៅរបស់ខ្លួនក្នុងការលុបបំបាត់ការគំរាមកំហែងពីរនៃកម្មវិធីមីស៊ីលបាលីស្ទិក និងនុយក្លេអ៊ែររបស់អ៊ីរ៉ង់ ឆាប់ៗនេះហើយ។ លោក Netanyahu បានសន្យាថានឹងមិនអនុញ្ញាតឱ្យអ៊ីស្រាអែល ត្រូវអូសទាញចូលក្នុងសង្គ្រាមនៃការបំផ្លិចបំផ្លាញទេ ប៉ុន្តែក៏និយាយថា លោកនឹងមិនបញ្ចប់យុទ្ធនាការរបស់អ៊ីរ៉ង់មុនពេលកំណត់ឡើយ។

នាយករដ្ឋមន្រ្តីរូបនេះបានប្រាប់អ្នកយកព័ត៌មានថា "អ៊ីស្រាអែល នឹងមិនបន្តសកម្មភាពលើសពីអ្វីដែលត្រូវការដើម្បីសម្រេចបាននោះទេ ប៉ុន្តែក៏នឹងមិនបញ្ចប់ឆាប់ពេកដែរ។ នៅពេលគោលបំណងត្រូវបានសម្រេច នោះប្រតិបត្តិការយោធានឹងត្រូវបានបញ្ចប់ ហើយការប្រយុទ្ធក៏នឹងបញ្ឈប់ដូចគ្នា"។

នៅពេលត្រូវសាកសួរពីកន្លែងលាក់ខ្លួននៃសារធាតុអ៊ុយរ៉ានីញ៉ូម ៦០% របស់អ៊ីរ៉ង់ លោក Netanyahu និយាយថា "អ៊ីស្រាអែលកំពុងតាមដានយ៉ាងដិតដល់ ព្រោះនោះជាធាតុផ្សំដ៏សំខាន់នៃកម្មវិធីនុយក្លេអ៊ែរ"។ លោកលើកឡើងថា ទីតាំងនុយក្លេអ៊ែរ Fordow របស់អ៊ីរ៉ង់ រងការខូចខាតយ៉ាងធ្ងន់ធ្ងរដោយសារគ្រាប់បែកឃួងបំផ្ទុះក្រោមដីរបស់អាមេរិក ប៉ុន្តែទំហំនៃការខូចខាតនៅមិនទាន់ច្បាស់ទេ។

គួរឱ្យដឹងថា មុនការវាយប្រហារលើកដំបូងរបស់អ៊ីស្រាអែល ប្រឆាំងនឹងរោងចក្រចម្រាញ់អ៊ុយរ៉ានីញ៉ូមរបស់អ៊ីរ៉ង់នៅថ្ងៃទី១៣ ខែមិថុនា ទីក្រុងតេអេរ៉ង់កំពុងចម្រាញ់សារធាតុអ៊ុយរ៉ានីញ៉ូមដ៏គ្រោះថ្នាក់នេះដល់ទៅ ៦០% នៃភាពសុទ្ធ ដែលជាជំហានមួយខិតទៅកៀកនឹងតួលេខ ៩០% ដែលត្រូវការសម្រាប់កម្រិតគ្រាប់បែកនុយក្លេអ៊ែរ៕