សមាជិកអង្គការណាតូ បានព្រមព្រៀងគ្នាកាលពីថ្ងៃអាទិត្យ (២២ មិថុនា) ចំពោះការបង្កើនឱ្យកាន់តែខ្ពស់នៃគោលដៅចំណាយវិស័យការពារជាតិដល់អត្រា ៥% នៃផលិតផលក្នុងស្រុកសរុប GDP ដូចដែលទាមទារដោយលោកប្រធានាធិបតីអាមេរិក Donald Trump ប៉ុន្តែប្រទេសសមាជិកអេស្ប៉ាញ កំពុងរារែកចិត្ត ដោយនិយាយថា ខ្លួនមិនចាំបាច់ធ្វើតាមការទាមទារនេះទេ ប៉ុន្មានថ្ងៃប៉ុណ្ណោះមុនកិច្ចប្រជុំកំពូលក្នុងទីក្រុងឡាអេ ដែលចង់បង្ហាញពីការរួបរួមគ្នា។

ក្រុមមន្ត្រីអង្គការណាតូ អន្ទះសារចង់បានការឯកភាពលើសេចក្តីថ្លែងការណ៍កិច្ចប្រជុំកំពូល ស្តីពីការប្តេជ្ញាចិត្តរួមលើការចំណាយថ្មីនៅមុនជំនួបនៅថ្ងៃពុធសប្ដាហ៍នេះ ប៉ុន្តែនាយករដ្ឋមន្ត្រីអេស្ប៉ាញ លោក Pedro Sanchez បានប្រកាសកាលថ្ងៃព្រហស្បតិ៍សប្ដាហ៍មុនថា លោកនឹងមិនប្តេជ្ញាតាមគោលដៅ ៥% ដ៏ខ្ពស់នេះទេ។

នាយកអង្គការណាតូ លោក Mark Rutte បានស្នើឱ្យឈានដល់គោលដៅនោះ ដោយជំរុញការចំណាយការពារស្នូលរបស់សម្ព័ន្ធយោធាពីអត្រា ២% ទៅតួលេខ ៣,៥% ថ្មីនៃ GDP និងចំណាយបន្ថែម ១,៥% ទៀតលើវិស័យពាក់ព័ន្ធ ដូចជាសន្តិសុខតាមអ៊ីនធឺណិត និងការសម្របសម្រួលផ្លូវ និងស្ពានសម្រាប់យានយន្តយោធា ដែលនាំឱ្យការចំណាយសរុបត្រូវបង្កើនដល់ ៥%។

បន្ទាប់ពីអ្នកការទូតយល់ព្រមលើសេចក្ដីព្រាងសម្រុះសម្រួលមួយកាលថ្ងៃអាទិត្យ លោក Sanchez បានប្រកាសយ៉ាងរហ័សថា អេស្ប៉ាញនឹងមិនចាំបាច់បំពេញគោលដៅ ៥% នោះទេ ហើយខ្លួននឹងចំណាយត្រឹមតែ ២,១% នៃ GDP ប៉ុណ្ណោះដើម្បីបំពេញតម្រូវការយោធាស្នូលរបស់ណាតូ។ ក្រុមមន្ត្រីអង្គការណាតូអះអាងថា ការបង្កើនចំណាយលើវិស័យការពារជាតិ គឺចាំបាច់ណាស់ដើម្បីទប់ទល់ការគំរាមកំហែងកាន់តែខ្លាំងឡើងពីរុស្ស៊ី និងអនុញ្ញាតឱ្យអឺរ៉ុប មានភាពទទួលខុសត្រូវបន្ថែមទៀតសម្រាប់សន្តិសុខរបស់ខ្លួន៕