ការវាយប្រហាររបស់សហរដ្ឋអាមេរិកលើរោងចក្រនុយក្លេអ៊ែរសំខាន់ៗចំនួន ៣ របស់អ៊ីរ៉ង់ កើតឡើងក្នុងពេលវេលា ដែលសេដ្ឋកិច្ចពិភពលោកកំពុងផុយស្រួយរួចហើយ ហើយទស្សនវិស័យ ឥឡូវនេះ ត្រូវអាស្រ័យលើថា តើសាធារណរដ្ឋឥស្លាមសងសឹកយ៉ាងខ្លាំងក្លាវិញយ៉ាងដូចម្ដេច។

មិនថាធនាគារពិភពលោក អង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច ហើយនិង IMF (មូលនិធិរូបិយវត្ថុអន្តរជាតិ) ស្ថាប័ននីមួយៗ សុទ្ធតែបានបន្ទាបការព្យាករកំណើនសេដ្ឋកិច្ចពិភពលោករបស់ខ្លួន នៅប៉ុន្មានខែថ្មីៗនេះ។ ការហក់ឡើងយ៉ាងខ្លាំងនូវតម្លៃប្រេង ឬឧស្ម័នធម្មជាតិ ឬការរំខានដល់ពាណិជ្ជកម្មដែលបណ្តាលមកពីកើនឡើងនូវភាពតានតឹងនៃជម្លោះបន្ថែមទៀត នឹងដើរតួជាកត្តាបន្ទច់បង្អាក់មួយទៀតដល់សេដ្ឋកិច្ចពិភពលោក។

អ្នកវិភាគសេដ្ឋកិច្ចរបស់បណ្ដាញសារព័ត៌មាន Bloomberg រួមទាំងលោក Ziad Daoud ផងដែរ បានសរសេរនៅក្នុងរបាយការណ៍មួយថា៖ «យើងនឹងរង់ចាំមើលថា តើទីក្រុងតេអេរ៉ង់ឆ្លើយតបយ៉ាងដូចម្ដេច ប៉ុន្តែការវាយប្រហារនេះ ទំនងជាធ្វើឲ្យជម្លោះតានតឹងខ្លាំងទៅៗ។ សម្រាប់សេដ្ឋកិច្ចពិភពលោក ជម្លោះដែលកំពុងរីករាលដាលនេះ បន្ថែមហានិភ័យឲ្យតម្លៃប្រេងហក់ឡើងកាន់តែខ្ពស់ និងជាកត្តាជំរុញឲ្យអតិផរណាកើនឡើង»។

ការកើនឡើងនូវហានិភ័យភូមិសាស្ត្រនយោបាយ លេចឡើងក្នុងពេលជាមួយគ្នានឹងលទ្ធភាពនៃការមានភាពតានតឹងអត្រាពន្ធ ក្នុងប៉ុន្មានសប្តាហ៍ខាងមុខនេះ ខណៈដែលការផ្អាកបណ្ដោះអាសន្នរបស់លោកប្រធានាធិបតីអាមេរិក Donald Trump ជុំវិញពន្ធ «បិដិការ» ដ៏ខ្ពស់របស់លោក ជិតផុតកំណត់ហើយ។ ផលប៉ះពាល់សេដ្ឋកិច្ចដ៏ធ្ងន់ធ្ងរបំផុត ដោយសារជម្លោះអូសបន្លាយ នៅតំបន់មជ្ឈិមបូព៌ា ទំនងជាត្រូវបានសម្គាល់ឃើញតាមរយៈតម្លៃប្រេងហក់ឡើង។

ក្រោយការវាយប្រហាររបស់អាមេរិក សន្ទស្សន៍ផលិតផលដែលអនុញ្ញាតឲ្យវិនិយោគិនប៉ាន់ស្មានការប្រែប្រួលតម្លៃប្រេងឆៅ បានឡើង ៨,៨ភាគរយ នៅលើវេទិកា IG Weekend Markets។ លោក Tony Sycamore អ្នកយុទ្ធសាស្រ្តរបស់ IG បាននិយាយថា ប្រសិនបើការប្រែប្រួលនោះបន្តមាន នៅពេលការជួញដូរចាប់ផ្ដើមឡើងវិញ លោកបានព្យាករថា ហ៊ុនប្រេងឆៅ WTI នឹងបើកការជួញដូរប្រហែល ៨០ដុល្លារ ក្នុងមួយបារ៉ែល។ ហើយយោងតាមលោក Daoud លោក Tom Orlik និងលោកស្រី Jennifer Welch បានឲ្យដឹងថា ក្នុងករណីមានសេណារីយ៉ូអាក្រក់ធ្ងន់ធ្ងរ ដែលច្រកសមុទ្រ Hormuz ត្រូវបានបិទ នោះប្រេងឆៅអាចឡើងដល់តម្លៃ ១៣០ដុល្លារ ក្នុងមួយបារ៉ែល៕