បន្ទាប់ពីបានបញ្ជូនសញ្ញាមិនច្បាស់លាស់ជាច្រើនថ្ងៃ លោកប្រធានាធិបតីអាមេរិក Donald Trump បានអនុញ្ញាតឲ្យមានការវាយប្រហារយោធាទ្រង់ទ្រាយធំលើរោងចក្រនុយក្លេអ៊ែរ Natanz, Fordow និង Isfahan របស់ប្រទេសអ៊ីរ៉ង់។ ការវាយប្រហារនោះអាចផ្ដល់ការខូចខាតយ៉ាងធ្ងន់ធ្ងរដល់កម្មវិធីនុយក្លេអ៊ែររបស់អ៊ីរ៉ង់ និងធ្វើឲ្យតំបន់មជ្ឈិមបូព៌ាស្ថិតក្នុងស្ថានភាពមិនប្រាកដប្រជាខ្លាំងឡើងៗ។ នេះបើតាមការរៀបរាប់របស់អ្នកសរសេរមួយរូប នៅក្នុងអត្ថបទវិភាគរបស់ខ្លួន។

អ្នកសរសេរអត្ថបទបានបន្តថា លោក Trump បានចាត់ទុកការវាយប្រហារនេះថា ជាវិធានការយោធាតែឯង ដែលធ្វើឡើងក្នុងគោលបំណងបង្ខំឲ្យអ៊ីរ៉ង់ចូលទៅកាន់តុចរចា ប៉ុន្តែការឆ្លើយតបដ៏យ៉ាងខ្លាំងក្លាពីទីក្រុងតេអេរ៉ង់ អាចបង្កឲ្យមានសង្រ្គាមក្នុងតំបន់កាន់តែទូលំទូលាយ។

អ្នកសរសេរអត្ថបទវិភាគ បានបញ្ជាក់ថា ចាប់តាំងពីអ៊ីស្រាអែល បានចាប់ផ្តើមប្រតិបត្តិការ Rising Lion ដើម្បីកម្ទេចកម្មវិធីនុយក្លេអ៊ែររបស់អ៊ីរ៉ង់ កាលពីថ្ងៃទី១៣ ខែមិថុនា រូបគេបានជួបជាមួយអ្នកជំនាញ និងប្រភពជាច្រើន នៅក្នុងទីក្រុងតេអេរ៉ង់ដែលដឹងទស្សននយោបាយសន្តិសុខរបស់អ៊ីរ៉ង់។ ការពិភាក្សាទាំងនេះបានបង្ហាញពីភាពតក់ស្លុត និងការខឹងសម្បារបស់អ៊ីរ៉ង់ ចំពោះសកម្មភាពរបស់អ៊ីស្រាអែល និងអាមេរិក។

អត្ថបទវិភាគនោះ បានបន្ថែមទៀតថា ទោះបីជាមេដឹកនាំកំពូលអ៊ីរ៉ង់ លោក Ayatollah Ali Khamenei និងកងឆ្មាំបដិវត្តន៍ឥស្លាម (IRGC) បានផ្ដល់ការព្រមានអស់ជាច្រើនទសវត្សរ៍មកហើយ អំពីលទ្ធភាពនៃការមានសង្គ្រាមជាមួយអ៊ីស្រាអែលក៏ដោយ ក៏គ្រប់គ្នានៅតែភ្ញាក់ផ្អើលជាខ្លាំង នៅក្នុងទីក្រុងតេអេរ៉ង់ ជាមួយនឹងពេលវេលា និងទំហំនៃសកម្មភាពវាយលុករបស់អ៊ីស្រាអែល។

ដោយឥឡូវនេះសេណារីយ៉ូករណីអាក្រក់បំផុត បានលេចឡើង អ៊ីរ៉ង់កំពុងប្រញាប់ប្រញាល់សម្របសម្រួលការឆ្លើយតបសងសឹកដ៏មានប្រសិទ្ធភាព។ ប្រសិទ្ធភាពនៃការសងសឹករបស់អ៊ីរ៉ង់ មានកម្រិតតិចតួចដោយសារការខ្វះខាតការគាំទ្រពីខាងក្រៅ។ 

នេះមានន័យថា ការឆ្លើយតបរបស់អ៊ីរ៉ង់ទំនងជាមិនធ្វើឡើងដោយមានគោលដាក់ជាក់លាក់។ ហើយថ្វីបើមានវោហាសាស្ត្របង្កសង្គ្រាមពីមេដឹកនាំរបស់ក្រុមហេសបូឡា លោក Naim Qassem និងឥស្សរជនជាន់ខ្ពស់មកពីក្រុមហ៊ួទីរបស់យេម៉ែនក៏ដោយ ក៏អ៊ីរ៉ង់ស្ទាក់ស្ទើរក្នុងការប្រមូលកងជីវពលប្រូកស៊ីរបស់ខ្លួនប្រឆាំងនឹងសហរដ្ឋអាមេរិក។ ទោះបីជាការវាយប្រហារដែលត្រូវបានរាយការណ៍ លើមូលដ្ឋានទ័ពអាមេរិក Ain al-Asad នៅភាគខាងលិចប្រទេសអ៊ីរ៉ាក់ កាលពីសប្តាហ៍មុន បានបង្ហាញពីសមត្ថភាពរបស់អ៊ីរ៉ង់ ក្នុងការកំណត់គោលដៅលើបុគ្គលិកយោធាអាមេរិកក៏ដោយ ក៏យុទ្ធសាស្ត្រជាទីពេញចិត្តរបស់ទីក្រុងតេអេរ៉ង់ គឺការសងសឹកដោយមិនប្រហារដោយផ្ទាល់លើអ៊ីស្រាអែល៕