ប្រព័ន្ធផ្សព្វផ្សាយរដ្ឋរបស់កូរ៉េខាងជើង បានរាយការណ៍ថា នៅថ្ងៃចន្ទ (ទី២៣ ខែមិថុនា) នេះ ប្រទេសកូរ៉េខាងជើង បានថ្កោលទោសយ៉ាងខ្លាំង ចំពោះការវាយប្រហាររបស់សហរដ្ឋអាមេរិកលអ៊ីរ៉ង់ ដោយចាត់ទុកថា ជាការរំលោភយ៉ាងធ្ងន់ធ្ងរលើផលប្រយោជន៍សន្តិសុខ និងសិទ្ធិដែនដីរបស់រដ្ឋ។

ក្រសួងការបរទេសកូរ៉េខាងជើង បានលើកឡើងថា សហរដ្ឋអាមេរិក និងអ៊ីស្រាអែល គឺជាពិរុទ្ធជននៃភាពតានតឹងបច្ចុប្បន្ន នៅតំបន់មជ្ឈិមបូព៌ា ដែលកើតចេញពី «ករថ្វើសង្រ្គាមឥឈប់ឈរ និងការពង្រីកដែនដី ដែលត្រូវបានទទួលស្គាល់ និងជំរុញដោយលោកខាងលិច"។

ដោយនិយាយក្នុងលក្ខខណ្ឌមិនបញ្ចេញឈ្មោះ អ្នកនាំពាក្យបានឲ្យដឹងនៅក្នុងសេចក្តីថ្លែងការណ៍មួយ ដែលផ្សាយដោយទីភ្នាក់ងារសារព័ត៌មាន KCNA ថា៖ «(កូរ៉េខាងជើង) ថ្កោលទោសយ៉ាងដាច់អហង្ការលើការវាយប្រហារលើប្រទេសអ៊ីរ៉ង់ពីសំណាក់សហរដ្ឋអាមេរិក ដែលបានជាន់ឈ្លីយ៉ាងខ្លាំងលើបូរណភាពទឹកដី និងផលប្រយោជន៍សន្តិសុខនៃរដ្ឋអធិបតេយ្យមួយ»។

សេចក្តីថ្លែងការណ៍នោះបានបន្ថែមថា៖ «សហគមន៍អន្តរជាតិ គួរតែលើកឡើងនូវសំឡេងចោទប្រកាន់ជាឯកច្ឆន្ទ និងការបដិសេធ ចំពោះទង្វើបង្កការប្រឈមមុខដាក់គ្នាពីសំណាក់សហរដ្ឋអាមេរិក និងអ៊ីស្រាអែលនេះ»។

គួរបញ្ជាក់ថា អ៊ីរ៉ង់ និងកូរ៉េខាងជើងដែលប្រដាប់ដោយអាវុធនុយក្លេអ៊ែរ បានរក្សាទំនាក់ទំនងមិត្តភាព និងត្រូវបានសង្ស័យអស់រយៈពេលជាច្រើនទសវត្សរ៍មកហើយ ជុំវិញកិច្ចសហប្រតិបត្តិការយោធា ក្នុងនោះរួមទាំងការអភិវឌ្ឍមីស៊ីលបាលីស្ទិកផងដែរ៕