អ្នកពន្លត់អគ្គិភ័យរាប់សិបនាក់ បានប្រឹងប្រែងទប់ទល់នឹងចំហេះព្រៃដែលកាន់តែរាលដាល ដោយសារខ្យល់បក់ខ្លាំង នៅលើកោះ Chios របស់ប្រទេសក្រិក នៅភាគឦសានសមុទ្រ Aegean ដែលថ្ងៃចន្ទ (ទី២៣ ខែមិថុនា) នេះ គឺជាថ្ងៃទី២ ហើយ ខណៈដែលអាជ្ញាធរបានជម្លៀសមនុស្សពីភូមិជាច្រើនទៀត។

អ្នកពន្លត់អគ្គិភ័យចំនួន ១៩០នាក់ ដែលមានជំនួយពីយន្តហោះ ៦គ្រឿង កំពុងព្យាយាមទប់ស្កាត់ការឆាបឆេះ និងរារាំងកុំឲ្យចំហេះរាលដាលដល់ផ្ទះសម្បែង។ នៅថ្ងៃចន្ទនេះ ខ្យល់កន្ត្រាក់បានបង្កជាឧសគ្គស្មុគស្មាញដល់កិច្ចប្រឹងប្រែងពន្លត់ចំហេះព្រៃនេះ ដែលបានឆាបឆេះព្រៃ និងវាលស្មៅ បង្ខំឲ្យអ្នកភូមិរាប់សិបនាក់ចាកចេញពីផ្ទះសម្បែងរបស់ពួកគេ ដើម្បីសុវត្ថិភាព និងបណ្តាលឲ្យមានការដាច់ចរន្តអគ្គិសនី។

ដោយស្ថិតនៅចុងប៉ែកខាងត្បូងដែលមានអាកាសធាតុក្ដៅរបស់អឺរ៉ុប ក្រិកបានរងប៉ះពាល់ទាំងផ្នែកសេដ្ឋកិច្ច និងបរិស្ថាន ដោយសារចំហេះព្រៃញឹកញាប់ ក្នុងរយៈពេលប៉ុន្មានឆ្នាំចុងក្រោយនេះ ដែលអ្នកវិទ្យាសាស្ត្រលើកឡើងថា បានមានសភាពធ្ងន់ធ្ងរឡើងៗ ដោយសារការប្រែប្រួលអាកាសធាតុយ៉ាងឆាប់រហ័ស។

ប្រទេសនេះបានចំណាយប្រាក់រាប់រយលានអឺរ៉ូ ដើម្បីផ្តល់សំណងដល់គ្រួសារ និងកសិករ សម្រាប់ការខូចខាតទាក់ទងនឹងអាកាសធាតុអាក្រក់ធ្ងន់ធ្ងរ ហើយទិញឧបករណ៍ពន្លត់អគ្គិភ័យថ្មី និងទំនើប ដើម្បីដោះស្រាយជាមួយចំហេះព្រៃ។ អ្នកពន្លត់អគ្គិភ័យច្រើនបំផុតមិនធ្លាប់មាន ត្រូវបានជួលក្នុងឆ្នាំនេះ ដោយសារលទ្ធភាពនៃការមានរដូវកាលចំហេះព្រៃដ៏លំបាកមួយ៕