មេដឹកនាំកំពូលរបស់អ៊ីរ៉ង់បានបញ្ជូនរដ្ឋមន្ត្រីការបរទេសរបស់លោកទៅកាន់ទីក្រុងមូស្គូ នៅថ្ងៃចន្ទ (ទី២៣ ខែមិថុនា) ដើម្បីសុំឲ្យលោកប្រធានាធិបតី Vladimir Putin ផ្ដល់ជំនួយបន្ថែមពីប្រទេសរុស្ស៊ី បន្ទាប់ពីកាលពីចុងសប្តាហ៍ សហរដ្ឋអាមេរិកបានចាត់វិធានការយោធាដ៏ធំបំផុតលើសាធារណរដ្ឋឥស្លាមជាលើកដំបូង គិតចាប់តាំងពីសម័យកាលបដិវត្តន៍ឆ្នាំ១៩៧៩។

ប្រធានាធិបតីអាមេរិក លោក Donald Trump និងអ៊ីស្រាអែល បានព្រលយពាក្យសម្ដីជាសាធារណៈ អំពីការសម្លាប់មេដឹកនាំកំពូល លោក Ayatollah Ali Khamenei និងអំពីការផ្លាស់ប្តូររបប ជាវិធានការដែលរុស្ស៊ីភ័យខ្លាចថា អាចពន្លិចតំបន់មជ្ឈិមបូព៌ាឲ្យកប់កាន់តែជ្រៅនៅក្នុងស្ថានភាពអាក្រក់បំផុត។

ទោះបីជាលោក Putin បានថ្កោលទោសការវាយប្រហាររបស់អ៊ីស្រាអែលក៏ដោយ ក៏លោកមិនទាន់បានធ្វើការអត្ថាធិប្បាយលើការវាយប្រហាររបស់សហរដ្ឋអាមេរិកលើទីតាំងនុយក្លេអ៊ែរអ៊ីរ៉ង់នៅឡើយទេ តែកាលពីសប្តាហ៍មុន លោកបានអំពាវនាវឲ្យមានភាពស្ងប់ស្ងាត់ ហើយផ្តល់តួនាទីឲ្យទីក្រុងម៉ូស្គូធ្វើជាអ្នកសម្របសម្រួលលើកម្មវិធីនុយក្លេអ៊ែររបស់អ៊ីរ៉ង់។

ប្រភពជាន់ខ្ពស់មួយបានប្រាប់សារព័ត៌មាន Reuters ថា រដ្ឋមន្ត្រីការបរទេសអ៊ីរ៉ង់ លោក Abbas Araqchi គ្រោងនឹងប្រគល់លិខិតពីលោក Khamenei ទៅលោក Putin ដែលជាសំបុត្រស្វែងរកការគាំទ្ររបស់ទីក្រុងតេអេរ៉ង់។

ប្រភពពីអ៊ីរ៉ង់បានប្រាប់សារព័ត៌មាន Reuters ថា អ៊ីរ៉ង់មិនទាន់ទទួលបានការគាំទ្រពីរុស្ស៊ីនៅឡើយទេ រហូតមកដល់ពេលនេះ ហើយប្រទេសនេះចង់ឲ្យលោក Putin ធ្វើបន្ថែមទៀត ដើម្បីគាំទ្រខ្លួនប្រឆាំងនឹងអ៊ីស្រាអែល និងសហរដ្ឋអាមេរិក។ ប្រភពមិនបានបញ្ជាក់លម្អិត អំពីជំនួយដែលទីក្រុងតេអេរ៉ង់ចង់បាននោះទេ៕