កីឡាទូក៖ ឯកឧត្តម ម៉ៅ ធនិន អភិបាលនៃគណៈអភិបាលខេត្តកំពត បានវាយតម្លៃខ្ពស់ចំពោះភាពរីកចម្រើននៃវិស័យកីឡាទូកកម្ពុជាបច្ចុប្បន្បន្ន បន្ទាប់ពីមានការកែទម្រង់រចនាសម្ព័ន្ធគ្រប់គ្រងរបស់ខ្លួន រហូតទទួលបានការចាប់អារម្មណ៍ និងគាំទ្រច្រើនពីមហាជន ពិសេសសមត្ថភាពកីឡាករ-កីឡាការិនីក៏មានការរីកចម្រើនគួរឲ្យកត់សម្គាល់ផងដែរ។
ទន្ទឹមជាមួយគ្នាដើម្បីជំរុញ និងពង្រឹងការអភិវឌ្ឍប្រភេទកីឡាលើទឹកនេះ ឆ្ពោះទៅរកភាពជោគជ័យនៅក្នុងព្រឹត្តិការណ៍ស៊ីហ្គេមឆ្នាំ២០២៣ នៅកម្ពុជា ឯកឧត្តមបានផ្ដល់នូវអនុសាសន៍ ៧ចំណុច៖
ទី១-ត្រូវខិតខំបើកវគ្គបណ្តុះបណ្តាល និងបង្កើនបរិមាណកីឡាករ-កីឡាការិនីវ័យក្មេងនៅតាមបណ្តាសមាគមក្លិបទូទាំងប្រទេស។
ទី២-ត្រូវមានធនធាន និងសម្ភារៈហ្វឹកហាត់ឲ្យបានគ្រប់គ្រាន់ សមាគមទូករាជធានី-ខេត្តដើម្បីងាយស្រួលក្នុងការហ្វឹកហាត់ និងចូលរួមប្រកួត។
ទី៣-ត្រូវពង្រឹងរចនាសម្ព័ន្ធគ្រប់គ្រងផ្ទៃក្នុង ដោយផ្តោតសំខាន់លើការបំពេញមុខងារប្រកបដោយភាពទទួលខុសត្រូវខ្ពស់។
ទី៤-ត្រូវពង្រឹងសមត្ថភាពមន្ត្រីបច្ចេកទេស និងអាកណ្តាលចៅក្រមឲ្យកាន់តែល្អប្រសើទាំងបរិមាណ និងគុណភាព។
ទី៥-ត្រូវខិតខំស្វែងរកដៃគូរសហការ និងក្រុមហ៊ុនឧបត្ថម្ភបន្ថែមទៀត ដើម្បីបង្កើតព្រឹត្តិការណ៍ប្រកួតឲ្យបានកាន់តែច្រើនក្នុងមួយឆ្នាំៗ តាមដែលអាចធ្វើទៅបាន។
ទី៦-ត្រូវជំរុញការផ្សព្វផ្សាយអំពីព្រឹត្តិការណ៍ប្រកួត និងសកម្មភាពការងាររបស់សហព័ន្ធឲ្យបានទូលំទូលាយ ដើម្បីទាក់ទាញការគាំទ្រពីវិស័យឯកជន និងសាធារណៈជនទាំងជាតិ និងអន្តរជាតិ។
និងទី៧-ត្រូវប្រឹងប្រែងរកទីលានប្រកួតប្រភេទកីឡាទូកស្តង់ដាមួយ ដើម្បីរៀបចំការប្រកួតជាលក្ខណៈអន្តរជាតិ។
ការលើកឡើងរបស់ឯកឧត្តម ម៉ៅ ធនិន ធ្វើឡើងក្នុងពិធីបិទការប្រកួតកីឡាទូកប្រពៃណីខ្នាតអន្ដរជាតិ ទូកនាគ ទូកកានូ-កាយ៉ាក់ ទូករ៉ូអ៊ីង ជ្រើសរើសជើងឯកថ្នាក់ជាតិ និងពានរង្វាន់សម្ដេចក្រឡាហោម ស ខេង លើកទី៨ ឆ្នាំ២០២១ កាលពីចុងសប្ដាហ៍កន្លងទៅនៅខេត្តកំពត ដោយមានប្រតិភូ គ្រូបង្វឹក និងកីឡាករ-កីឡាការិនីចូលរួមសរុប ២៨០នាក់មកពីសមាគម/ក្លិប និងក្រសួង-ស្ថាប័នចំនួន ១៩។ ចំពោះលទ្ធផលបច្ចេកទេសនៃព្រឹត្តិការណ៍ប្រចាំឆ្នាំនេះ គឺសមាគមកីឡាទូកក្រសួងមហាផ្ទៃដណ្ដើមបានមេដាយច្រើនជាងគេសរុប ៩គ្រឿង មាស៤ ប្រាក់២ និងសំរឹទ្ធ៣។ អង្គភាពកីឡានគរបាលជាតិឈរលេខ២ ឈ្នះមេដាយសរុប ៥គ្រឿង មាស២ ប្រាក់២ និងសំរឹទ្ធ១ ។ ក្រុមប្រឹក្សាកីឡាក្រសួងមហាផ្ទៃឈរលេខ៣ ឈ្នះមេដាយសរុប ៤គ្រឿង មាស២ និងសំរឹទ្ធ២។ សមាគមកីឡាទូកបញ្ជាការដ្ឋានកងទ័ពជើងទឹកឈរលេខ៤ ឈ្នះមេដាយសរុប ៤គ្រឿង មាស១ ប្រាក់២ និងសំរឹទ្ធ១ និងសមាគមកីឡាទូកខេត្តកណ្ដាលដណ្ដើមបានមេដាយ ២គ្រឿង មាស១ និងប្រាក់១ ឈរលេខ៥៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
