យោងតាមការអះអាងរបស់ក្រុមមន្រ្តី បានឲ្យដឹងថា ការវាយប្រហារយានដ្រូន និងមីស៊ីលទ្រង់ទ្រាយធំរបស់រុស្ស៊ី បានសម្លាប់មនុស្សយ៉ាងហោច ១០នាក់ នៅរដ្ឋធានីគីវ របស់ប្រទេសអ៊ុយក្រែន និងតំបន់ជុំវិញ ។

ក្រុមមន្រ្តីនិយាយថា ការវាយប្រហារនៅព្រឹកថ្ងៃចន្ទនេះ មានគោលដៅលើតំបន់រស់នៅរបស់អ្នកស្រុក នៅតាមសង្កាត់ជាច្រើននៅទូទាំងរដ្ឋធានីគីវ ។ 

ការវាយប្រហារនេះដែរ ដែលជាការវាយទ្រង់ទ្រាយធំលើកទី ២ ក្នុងរយៈពេល ១សប្តាហ៍ បង្ហាញថា រុស្ស៊ីមានបំណងចង់បង្កើនសំពាធ ស្របពេលដែលចំណាប់អារម្មណ៍របស់សកលលោក ផ្តោតសំខាន់លើការសម្រេចចិត្តរបស់សហរដ្ឋអាមេរិក ក្នុងការចូលរួមយុទ្ធនាការយោធារបស់អ៊ីស្រាអែល ប្រឆាំងអ៊ីរ៉ង់ ។

យោងតាមការអះអាងរបស់កងទ័ពអាកាសអ៊ុយក្រែន បានឲ្យដឹងថា រុស្ស៊ីបានបាញ់បង្ហោះយានដ្រូន យានបញ្ឆោតចំនួន ៣៥២គ្រឿង មីស៊ីលបាលីស្ទិក ១១គ្រាប់ និងមីស៊ីលតម្រង់គោលដៅ ៥គ្រាប់ ។ 

ពួកគេនិយាយនៅក្នុងសេចក្តីថ្លែងការណ៍ថា ប្រព័ន្ធការពារដែនអាកាស បាញ់ស្កាត់បានកាំជ្រួចផ្លោងភាគច្រើន មុនពេលវាដល់គោលដៅ ។

លោក Tymur Tkachenko គឺជាប្រធានរដ្ឋបាលយោធាទីក្រុងគីវ និយាយនៅក្នុងសេចក្តីថ្លែងការណ៍ថា វាគឺជាការវាយប្រហារទ្រង់ទ្រាយធំមួយទៀតលើទីក្រុងគីវ ដែលជារលកដ៏ច្រើននៃយានដ្រូនសត្រូវ ៕