ប្រធានាធិបតីបណ្តោះអាសន្នស៊ីរី លោក Ahmed al-Sharaa នៅថ្ងៃចន្ទ (ទី២៣ ខែមិថុនា) នេះ បានប្តេជ្ញាថា អ្នកដែលជាប់ពាក់ព័ន្ធក្នុងការវាយប្រហារអត្តឃាតលើវិហារមួយ ក្នុងទីក្រុងដាម៉ាស នៅមួយថ្ងៃមុននេះ នឹងត្រូវប្រឈមជាមួយនឹងដំណើរការកាត់ទោស នៅតុលាការ ដោយអំពាវនាវឲ្យមានសាមគ្គីភាព ក្រោយមានការវាយប្រហារដ៏សាហាវយង់ខ្នងនេះ។

លោក al-Sharaa បានឲ្យដឹងនៅក្នុងសេចក្តីថ្លែងការណ៍មួយថា៖ «យើងសូមប្ដេជ្ញាថា យើងនឹងធ្វើការទាំងយប់ទាំងថ្ងៃ ដោយប្រមូលផ្តុំភ្នាក់ងារសន្តិសុខជំនាញៗទាំងអស់របស់យើង ដើម្បីចាប់ខ្លួនអ្នកដែលបានចូលរួម និងរៀបចំផែនការឧក្រិដ្ឋកម្មដ៏សាហាវនេះ ហើយនាំពួកគេទៅកាត់ទោស តាមផ្លូវច្បាប់»។

លោកបានបន្ថែមថា ការវាយប្រហារនេះ «រម្លឹកយើងពីសារៈសំខាន់នៃការមានសាមគ្គីភាព និងឯកភាព រវាងរដ្ឋាភិបាល និងប្រជាជន ដើម្បីប្រឈមជាមួយនឹងបញ្ហាទាំងអស់ដែលគំរាមដល់សន្តិសុខ និងស្ថិរភាពរបស់ប្រទេសយើង»។

គួរបញ្ជាក់ថា អាជ្ញាធរបានឲ្យដឹងថា ការបាញ់ប្រហារ និងការបំផ្ទុះគ្រាប់បែកអត្តឃាត នៅវិហារមួយ ក្នុងទីក្រុងដាម៉ាស ក្នុងអំឡុងពេលនៃការមានពិធីបុណ្យមួយ កាលពីថ្ងៃអាទិត្យ (ទី២២ ខែមិថុនា) បានសម្លាប់មនុស្សយ៉ាងហោចណាស់ ២២នាក់ ដោយបានដាក់ការទទួលខុសត្រូវទៅលើសមាជិកម្នាក់នៃក្រុមរដ្ឋឥស្លាម (IS) ចំពោះការវាយប្រហារដែលមិនធ្លាប់មានពីមុនមកនេះ៕