សូហ្វតិន្នីស៖ ក្លិបក្រសួងមហាផ្ទៃបានគ្រងជើងឯក នៃការប្រកួតកីឡាសូហ្វតិន្នីសជើងឯកថ្នាក់ជាតិ និងពានរង្វាន់សម្ដេចក្រឡាហោម ស ខេង លើកទី៨ ឆ្នាំ២០២១ ក្រោយដណ្ដើមបានមេដាយមាសគ្រប់វិញ្ញាសា ក្រោយឆ្លងកាត់ការប្រកួតដ៏ស្វិតស្វាញរយៈពេល ៦ថ្ងៃដែលទើបបញ្ចប់ការប្រកួតកាលពីថ្ងៃទី២៦ ខែធ្នូម្សិលមិញ។
លោក ជា សែនវិស្សុត អគ្គលេខាធិការសហព័ន្ធកីឡាសូហ្វតិន្នីសកម្ពុជាបានឲ្យដឹងថា ការប្រកួតជើងឯកថ្នាក់ជាតិឆ្នាំនេះមានកីឡាករ-កីឡាការិនី ៦៣នាក់មកពី ៦សមាគម/ក្លិប និងក្រសួងចូលរួមដែលធ្វើការប្រកួតលើ ៩វិញ្ញាសា។ ចំពោះការប្រកួតបានធ្វើឡើងនៅមជ្ឈមណ្ឌលកីឡា CCC និងពិធីបិទបានធ្វើឡើងនៅមជ្ឈមណ្ឌលកីឡានគរបាលជាតិកម្ពុជា។ ចំពោះលទ្ធផលបច្ចេកទេសនៃការប្រកួតក្លិបក្រសួងការពារជាតិឈរលេខ១ ដណ្ដើមបានមេដាយសរុប ១៣គ្រឿង មាស ៩គ្រឿង និងប្រាក់ ៤គ្រឿង ខណៈក្លិបអគ្គស្នងការនគរបាលជាតិឈរលេខ២ ដណ្ដើមបានមេដាយប្រាក់៤ និងសំរឹទ្ធ៦។ រីឯក្លិបក្រសួងការពារជាតិឈរលេខ៣ ឈ្នះមេដាយប្រាក់១ និងសំរឹទ្ធ១។ ចំណែកក្លិបខេត្តកំពង់ឆ្នាំង និងខេត្តកំពង់ស្ពឺដណ្ដើមបានមេដាយសំរឹទ្ធ ១គ្រឿងម្នាក់ដូចគ្នា។
ឯកឧត្តមបណ្ឌិត ជា ប៊ុនហេង អនុប្រធានទី១ នៃសហព័ន្ធកីឡាសូហ្វតិន្នីសកម្ពុជា បានវាយតម្លៃខ្ពស់ចំពោះដំណើរការប្រកួត និងការខិតខំប្រឹងប្រែងរបស់កីឡាករ-កីឡាការិនីក្នុងព្រឹត្តិការណ៍ជើងឯកថ្នាក់ជាតិឆ្នាំនេះ ដែលបានបង្ហាញនូវភាពស្វាហាប់ និងការប្រកួតប្រជែងខ្ពស់ឆ្លុះបញ្ចាំងឲ្យឃើញភាពរីកចម្រើន ទាំងសមត្ថភាព និងបច្ចេកទេសរបស់កីឡាករ-កីឡាការិនីម្នាក់ៗ។ តាមរយៈនេះក្នុងនាមសហព័ន្ធ ឯកឧត្តមបានប្ដេជ្ញានឹងបន្ដខិតខំជំរុញការអភិវឌ្ឍវិស័យកីឡាមួយនេះ ឲ្យកាន់តែរីកចម្រើនបន្ថែមទៀត ពិសេសកីឡាករ-កីឡាការិនី ទាំងអ្នកទទួលបានជ័យលាភី និងមិនទទួលបានមេដាយត្រូវបន្ដការខិតខំប្រឹងប្រែង ដើម្បីត្រៀមការប្រកួតប្រជែងថ្នាក់ជាតិផ្សេងៗ និងឈានទៅចាប់យកឱកាសចូលរួមការប្រកួតអន្ដរជាតិនានា ពិសេសត្រៀមការប្រកួតកីឡាស៊ីហ្គេមឆ្នាំ២០២៣ នៅកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
