នៅថ្ងៃចន្ទនេះ ប្រជាពលរដ្ឋរស់នៅក្នុងទីក្រុងប៉េកាំងនាំគ្នារកកន្លែងមានម្លប់ឈើ និងទីកន្លែងត្រជាក់នៅតាមមាត់ព្រែក ពេលដែលក្រុមអាជ្ញាធរ ចេញការព្រមានអាកាសធាតុក្តៅបំផុតទី ២សម្រាប់រដ្ឋធានីចិនមួយនេះ ដែលស្ថិតក្នុងចំណោមថ្ងៃក្តៅបំផុតប្រចំាឆ្នាំ មកទល់នឹងពេលនេះ ។

ចិនមាននូវរដូវក្តៅក្តៅខ្លាំងក្នុងរយៈពេលប៉ុន្មានឆ្នាំចុងក្រោយនេះ ក្នុងនោះរលកកម្តៅ បានវាយប្រហារតំបន់ភាគខាងជើង ក៏ដូចជាតំបន់ភាគខាងត្បូង បើទោះបីជាមានភ្លៀងធ្លាក់ខ្លាំង និងទឹកជំនន់ក៏ដោយ ។

ក្រុមអាជ្ញាធរនៅក្នុងទីក្រុងដែលមានពលរដ្ឋរស់នៅចំនួន ២២លាននាក់នេះ ជំរុញឲ្យសាធារណជនចាត់វិធានការប្រុងប្រយ័ត្នជាមុន ក្នុងនោះសីតុណ្ហភាពអាចនឹងកើនឡើងដល់ ៣៨អង្សាសេ ។

លោក Li Weijun គឺជាអ្នកហាត់ការមួយរូបនិយាយប្រាប់ទីភ្នាក់ងារព័ត៌មាន AFPនៅរសៀលថ្ងៃចន្ទនេះថា វាពិតជាក្តៅមែន ជាពិសេសរយៈពេលប៉ុន្មានថ្ងៃកន្លងមកនេះ ។

លោកបន្តថា លោកឈប់ស្លៀកពាក់ឯកសណ្ឋានទៅធ្វើការទៀតហើយ និងពន្យាពេលការហាត់ប្រាណរបស់លោករហូតដល់ម៉ោង ១០យប់ ។ លោកគិតថាវាពាក់ព័ន្ធជាមួយបញ្ហាបម្រែបម្រួលអាកាសធាតុ ហើយអាចប្រហែលមកពីការខូចធម្មជាតិផងដែរ ៕