ប្រធានាធិបតីបណ្តោះអាសន្នរបស់ប្រទេសស៊ីរី លោក Ahmed al-Sharaa បានសន្យាថា អ្នកជាប់ពាក់ព័ន្ធក្នុងការវាយប្រហារអត្តឃាត «ដ៏ឃោឃៅ» នៅព្រះវិហារមួយកន្លែងក្នុងទីក្រុងដាម៉ាសនឹងប្រឈមមុខការកាត់ទោស ដោយអំពាវនាវឱ្យមានសាមគ្គីភាពនៅក្នុងប្រទេស។

ក្រសួងសុខាភិបាលបាននិយាយថា ការបាញ់ប្រហារ និងការបំផ្ទុះគ្រាប់បែកអត្តឃាត កាលពីថ្ងៃអាទិត្យនៅព្រះវិហារមួយកន្លែងក្នុងសង្កាត់ Dwelaa រដ្ឋធានីប្រទេសស៊ីរី បានសម្លាប់មនុស្ស២៥នាក់ និងរបួស ៦៣នាក់ ដោយបានបង្កើនចំនួនអ្នកស្លាប់មុនត្រឹមតែ ២២នាក់។ អាជ្ញាធរបាននិយាយថា អ្នកវាយប្រហារមានទំនាក់ទំនងជាមួយក្រុមរដ្ឋឥស្លាម។

លោក Sharaa បាននិយាយនៅក្នុងសេចក្តីថ្លែងការណ៍ថា «យើងសន្យាថា យើងនឹងធ្វើការទាំងយប់ទាំងថ្ងៃ ដោយប្រមូលផ្តុំភ្នាក់ងារសន្តិសុខជំនាញរបស់យើងទាំងអស់ ដើម្បីចាប់ខ្លួនអ្នកដែលបានចូលរួម និងរៀបចំផែនការឧក្រិដ្ឋកម្មដ៏បង្ហូរឈាមនេះ ហើយនាំយកពួកគេមកកាត់ទោស»។

លោកបាននិយាយបន្ថែមថា ការវាយប្រហារនេះ «រំឭកដល់យើងពីសារៈសំខាន់នៃសាមគ្គីភាព និងឯកភាពរបស់រដ្ឋាភិបាលនិងប្រជាជន ក្នុងការប្រឈមមុខទៅនឹងការគំរាមកំហែងដល់សន្តិសុខ និងស្ថិរភាពរបស់ប្រទេសយើង»។

ការថ្កោលទោស បានបន្តពីសហគមន៍អន្តរជាតិ បន្ទាប់ពីការវាយប្រហារនេះ ជាការវាយប្រហារដំបូងនៅក្នុងរដ្ឋធានីប្រទេសស៊ីរី ចាប់តាំងពីកងកម្លាំងដឹកនាំដោយក្រុមអ៊ីស្លាមនិយម បានផ្តួលរំលំមេដឹកនាំយូរអង្វែង លោក Bashar al-Assad កាលពីខែធ្នូ។