សម្ព័ន្ធយោធាណាតូ កំពុងរៀបចំកិច្ចប្រជុំកំពូលនៅទីក្រុងឡាអេ ប្រទេសហូឡង់ ក្នុងសប្តាហ៍នេះ ដើម្បីផ្គាប់ចិត្តប្រធានាធិបតីអាមេរិក លោក Donald Trump ជាមួយនឹងគោលដៅចំណាយលើវិស័យការពារជាតិថ្មីមួយកាន់តែខ្ពស់ជាងមុន ប៉ុន្តែឥឡូវនេះ កិច្ចពិភាក្សាហាក់គ្របដណ្ដប់ទៅដោយផលប៉ះពាល់នៃការវាយប្រហារយោធារបស់អាមេរិក លើអ៊ីរ៉ង់។

ជំនួបរយៈពេលពីរថ្ងៃនេះ គឺនៅថ្ងៃអង្គារ និងថ្ងៃពុធ ក៏មានបំណងផ្តល់សញ្ញាដល់ប្រធានាធិបតីរុស្ស៊ី លោក Vladimir Putin ថា អង្គការណាតូកំពុងរួបរួមគ្នា បើទោះបីជាលោក Trump ធ្លាប់រិះគន់សម្ព័ន្ធយោធានេះក៏ដោយ ហើយបានប្តេជ្ញាចិត្តពង្រីក និងបង្កើនការការពាររបស់ខ្លួន ដើម្បីទប់ស្កាត់ការវាយប្រហារណាមួយពីទីក្រុងមូស្គូ។

កិច្ចប្រជុំកំពូល និងសេចក្តីថ្លែងការណ៍ចុងក្រោយនឹងមានរយៈពេលខ្លី ហើយផ្តោតលើការធ្វើតាមការអំពាវនាវរបស់លោក Trump ឱ្យចំណាយ ៥% នៃ GDP លើវិស័យការពារជាតិ ដែលជាអត្រាហក់លោតដ៏ធំមួយពីគោលដៅ ២% បច្ចុប្បន្ន។ គោលដៅនេះត្រូវបានសម្រេចដោយការវិនិយោគបន្ថែមទៀតទាំងផ្នែកយោធា និងការចំណាយទាក់ទងនឹងសន្តិសុខ។

ប្រធានាធិបតីអ៊ុយក្រែន លោក Volodymyr Zelenskiy នឹងអង្គុយរួមតុអាហារពេលល្ងាចមួយមុនកិច្ចប្រជុំកំពូលនៅល្ងាចថ្ងៃអង្គារ (២៤ មិថុនា) នេះ ដោយមិនចូលកិច្ចប្រជុំផ្លូវការជាមួយមេដឹកនាំនៅថ្ងៃពុធបន្ទាប់នោះទេ ដោយសារទំនាក់ទំនងងាយប្រែក្លាយជាជម្លោះរបស់លោកជាមួយលោក Trump។

ការទម្លាក់គ្រាប់បែករបស់អាមេរិក លើទីតាំងនុយក្លេអ៊ែរអ៊ីរ៉ង់ នៅចុងសប្តាហ៍ បានធ្វើឱ្យកិច្ចប្រជុំកំពូលនេះ ពិបាកព្យាករណាស់សម្រាប់ប្រមុខអង្គការណាតូ លោក Mark Rutte — ជាអតីតនាយករដ្ឋមន្ត្រីហូឡង់ ដែលជាម្ចាស់ផ្ទះជំនួបនេះក្នុងទីក្រុងកំណើតរបស់លោក — ហើយក៏ប្រហែលជាពិបាកសម្រេចនូវអ្វីដែលប្រទេសសមាជិកណាតូផ្សេងទៀតចង់បានពោលគឺការរួបរួម។ ប្រសិនបើកិច្ចប្រជុំនេះមិនដំណើរការល្អតាមផែនការទេ នោះអង្គការណាតូនឹងប្រថុយនឹងភាពទន់ខ្សោយ និងបែកបាក់គ្នាកាន់តែជ្រៅ៕