ជុំវិញកម្ដៅវិវាទព្រំដែនរវាង កម្ពុជា-ថៃ ហើយកំពុងឈានដល់ការបិទច្រកព្រំដែន​ជា​ឯកតោភាគី​របស់​ភាគី​ថៃ​ទាំង​ស្រុងបន្ថែមទៀតនោះ មន្រ្ដីជាន់ខ្ពស់ក្រសួងពាណិជ្ជកម្ម បានបញ្ជាក់ថា រាជ​រដ្ឋាភិបាល​កម្ពុជា​បានត្រៀមលក្ខណៈរួចហើយ ជាពិសេសបណ្ដាក្រសួង ស្ថាប័នពាក់ព័ន្ធ​លើ​ការ​ធានា​ឱ្យ​មាន​ប្រភពផ្គត់ផ្គង់គ្រប់គ្រាន់ និងតម្លៃសមរម្យទាំងប្រេងឥន្ធនៈ និងការផ្គត់ផ្គង់​ផ្សេងៗ​ទៀត​ឆ្លើយ​តបទៅនឹងវិធានការជាឯកតោភាគីរបស់ថៃ។

ឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យ​ក្រសួង​ពាណិជ្ជ​កម្ម​កម្ពុជា​មាន​ប្រសាសន៍​ប្រាប់ប៊ីធីវី ឱ្យដឹងថា ជុំវិញតម្លៃផ្លែឈើ បន្លែ និងគ្រឿងឧបភោគ បរិភោគផ្សេងៗ លោក​ជំទាវ​រដ្ឋ​មន្រ្តីក្រសួងពាណិជ្ជកម្មបានដាក់វិធានការ ជាយន្តការមួយដើម្បីឱ្យក្រុមការងារ ពិសេស​ខេត្ត​ដែល​ជា​ប់​ព្រំដែន​ធ្វើ​ការ​តាម​ដាន​តម្លៃ​ទំនិញ​ទាំងអស់​នោះ​ជា​ប្រចាំ​ហើយ​ឱ្យ​បាន​ម៉ត់ចត់​ជា​ទី​បំផុត​។ បើកន្លែងណាមានការឡើងថ្លៃក្រសួងនឹងធ្វើអន្តរាគមន៍តាមរយៈកិច្ចសម្រួលពាណិជ្ជកម្ម ដើម្បី​ធ្វើយ៉ាងណាឱ្យទីផ្សារមានស្ថិរភាព។

ឯកឧត្តមបានបន្តថា ចំពោះបញ្ហាប្រេងឥន្ធនៈ មានការឡើងថ្លៃបន្តិចទាំងម៉ាស៊ូត និងសាំង ប៉ុន្ដែ​ការ​កើនឡើងនេះគឺជាការប្រែប្រួលតម្លៃប្រេងអន្តរជាតិ មិនមែន​ដោយ​សារ​ការ​បិទ​ការ​នាំចូល​ប្រេង​ឥន្ធនៈ​ពីថៃនោះទេ។ ឯកឧត្តម បានគូសបញ្ជាក់ថា តម្លៃដែលកើន​នេះ​មិន​មែន​អាស្រ័យ​លើ​ការ​បិទ​មិន​ទទួល​ទិញ ឬក៏បិទមិនឱ្យនាំចូលប្រេងឥន្ធនៈពីថៃនោះទេ ប៉ុន្ដែផ្អែកតាមការ​គណនា​ទៅ​តាម​ថ្លៃ​បេ្រង​លើទី​ផ្សារអន្តរជាតិ។ ខណៈបច្ចុប្បន្ននេះប្រេងឆៅបានឡើងថ្លៃប្រហាក់ប្រហែល៧៧ ឬ៧៨ ដុល្លារ ក្នុងមួយបារ៉ែល ដូច្នេះបើប្រេងឆៅឡើង​ថ្លៃ​នោះ​ប្រេង​ចម្រាញ់​រួច​ក៏​ត្រូវ​ឡើង​ថ្លៃ​ដូចគ្នា។​

ប្រជាពលរដ្ឋរស់នៅរាជធានីភ្នំពេញ ទាំងអាជីវករ និងអ្នកទិញបានលើកឡើងថា សព្វថ្ងៃនេះ​តាម​ការ​មើល​ឃើញជាក់ស្តែង ទាំងរបស់របរប្រើប្រាស់ ស្លៀកពាក់ សម្ភារៈផ្សេងៗ និងហូបចុកជាដើម គឺ​មាន​ច្រើនសន្ធឹកសន្ធាប់ណាស់ មិនមានករខ្វះខាតអ្វីឡើយ។ ក្នុងឱកាស​នោះប្រ​ជាពលរ​ដ្ឋបាន​លើក​ទឹក​ចិត្តដល់កងទ័ពជួរមុខទាំងអស់បំពេញការងារប្រកបដោយភាពជោគជ័យគ្រប់ភារកិច្ច និង​បាន​អំពាវនាវ​ដល់​ប្រជាពលរដ្ឋ​ខ្មែរ​ទាំង​អស់​ផ្តល់​ការ​ទុក​ចិត្ត​ដល់​រាជ​រដ្ឋាភិបាល​ក្នុង​ការ​ដឹកនាំ​ប្រទេស​ឈាន​ទៅរកភាពរីកចម្រើន និងសន្តិភាពទាំងអស់គ្នា៕ អត្ថបទ៖ ឈិត បូរ៉ាវី