សមាជិកសភាមកពីបក្សប្រជាធិបតេយ្យ ៣រូប ក្នុងសភាតំណាងរាស្រ្តអាមេរិក កាលពីថ្ងៃចន្ទ (២៣ មិថុនា) បានដាក់ស្នើសេចក្ដីសម្រេចមួយស្ដីពីអំណាចសង្រ្គាម ដើម្បីត្រួតពិនិត្យមើលការប្រើប្រាស់កម្លាំងយោធារបស់លោកប្រធានាធិបតី Donald Trump ប្រឆាំងនឹងអ៊ីរ៉ង់ បន្ទាប់ពីសហរដ្ឋអាមេរិក បានធ្វើការវាយប្រហារលើទីតាំងនុយក្លេអ៊ែររបស់ទីក្រុងតេអេរ៉ង់ កាលពីចុងសប្ដាហ៍។

គណបក្សសាធារណៈរដ្ឋរបស់លោក Trump មានសំឡេងភាគច្រើននៅក្នុងសភាតំណាងរាស្រ្ត និងព្រឹទ្ធសភា ហើយសេចក្ដីសម្រេចណាមួយ ដែលចង់ដាក់កម្រិតលើសកម្មភាពរបស់លោក Trump ទំនងជាមិនអាចឆ្លងផុតសភាទាំងពីរនោះទេ។

សេចក្តីថ្លែងការណ៍រួមមួយ ដែលចេញផ្សាយកាលពីល្ងាចថ្ងៃចន្ទ ដោយតំណាងរាស្រ្តបក្សប្រជាធិបតេយ្យអាមេរិក ៣រូបឈ្មោះ Jim Himes, Gregory Meeks និង Adam Smith បានកើតឡើងប៉ុន្មានម៉ោងប៉ុណ្ណោះបន្ទាប់ពីលោក Trump បានអះអាងនៅលើប្រព័ន្ធផ្សព្វផ្សាយសង្គមថា អ៊ីស្រាអែល និងអ៊ីរ៉ង់ បានយល់ព្រមលើបទឈប់បាញ់។

មាជិកសភាបក្សប្រជាធិបតេយ្យ និងសាធារណៈរដ្ឋមួយចំនួន បានអំពាវនាវឱ្យសភាគ្រប់គ្រងការប្រើកម្លាំងយោធារបស់លោក Trump នៅអ៊ីរ៉ង់ និងរារាំងការជាប់ពាក់ព័ន្ធរបស់អាមេរិក នៅក្នុងជម្លោះ។ សមាជិកសភាអាមេរិកខាងបក្សប្រជាធិបតេយ្យជាច្រើនបាននិយាយថា សកម្មភាពរបស់លោក Trump គឺមិនស្របតាមរដ្ឋធម្មនុញ្ញទេ ហើយថា មានតែសភាទេដែលមានអំណាចក្នុងការប្រកាសសង្គ្រាមលើប្រទេសបរទេស៕