នៅថ្ងៃអង្គារ (ទី២៤ ខែមិថុនា) នេះ ក្រុមបាតុករមកពីបណ្តាញនិស្សិត និងប្រជាជន ដើម្បីកំណែទម្រង់ប្រទេសថៃ ហៅកាត់ថា NSPRT ដឹកនាំដោយលោក Pichit Chaimongkol (ពីជីត ចៃមង្គល) បានប្រមូលផ្តុំគ្នានៅខាងក្រៅវិមានរដ្ឋាភិបាល ដើម្បីទាមទារឲ្យនាយករដ្ឋមន្ត្រី លោកស្រី Paetongtarn Shinawatra (ផែថងថាន ស៊ីណាវ៉ាត់) ចុះចេញពីតំណែង ក្រោយមានវិបត្តិនយោបាយ នៅក្នុងប្រទេស។

បាតុកម្មនោះ មានរំលេចឡើងនូវសកម្មភាពជានិមិត្តរូប ក្នុងនោះរួមទាំងការបង្ហាញបដាពណ៌សប្រវែង ១០០ម៉ែត្រ ដែលសរសេរសាររិះគន់នាយករដ្ឋមន្ត្រីជាសាធារណៈ។ ក្រុមបាតុករបានដើរដង្ហែទៅកាន់បរិវេណនៃវិមានរដ្ឋាភិបាល ក្នុងតំបន់ Dusit នៃទីក្រុងបាងកក ហើយបានអានសេចក្តីថ្លែងការណ៍ផ្លូវការមួយដែលបង្ហាញពីជំហររបស់ពួកគេ។

លោក Pichit បានបញ្ជាក់ថា ក្រុមនេះកំពុងអំពាវនាវឲ្យលោកស្រី Paetongtarn ចុះចេញពីតំណែងជាបន្ទាន់ ដោយចោទប្រកាន់លោកស្រីថា ធ្វើឲ្យប៉ះពាល់ដល់ផលប្រយោជន៍ជាតិ ដែលមិនកំពុងត្រូវបានកំណត់ជាអាទិភាពនោះឡើយ ហើយជំនួសមកវិញ បានផ្ដល់ឲ្យមានភាពងាយរងគ្រោះ ក្នុងសន្តិសុខជាតិ។

អ្នកដឹកនាំការតវ៉ារូបនេះបានលើកឡើងថា៖ «នេះជាការបរាជ័យក្នុងការដឹកនាំ កង្វះការទទួលខុសត្រូវ និងមានភាពទន់ខ្សោយខ្លាំង ក្នុងពេលមានវិបត្តិជាតិ។ ឥឡូវនេះ ប្រជាជនគ្រប់មជ្ឈដ្ឋានទាមទារឲ្យនាយករដ្ឋមន្ត្រីទទួលខុសត្រូវ ដោយការចុះចេញពីតំណែង»។

លោក Pichit បានបន្ថែមថា ការសម្រេចថ្មីៗនេះរបស់គណៈកម្មាធិការជាតិប្រឆាំងអំពើពុករលួយ (NACC) ក្នុងការទទួលយកសំណុំរឿងរំលោភក្រមសីលធម៌ប្រឆាំងនឹងលោកស្រី Paetongtarn ដើម្បីធ្វើការស៊ើបអង្កេតនោះ បានធ្វើឲ្យភាពស្របច្បាប់របស់លោកស្រីកាន់តែចុះខ្សោយហើយ៕