តំណាងជាន់ខ្ពស់របស់សហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ Kaja Kallas បានថ្លែងនៅពេលមកដល់កិច្ចប្រជុំរដ្ឋមន្ត្រីការបរទេសសហភាពអឺរ៉ុបថា ការបិទច្រកសមុទ្រ Hormuz ដោយអ៊ីរ៉ង់ នឹងក្លាយជាការគំរាមកំហែងដ៏ធំមួយ ដូច្នេះរដ្ឋមន្ត្រីការបរទេសសហភាពអឺរ៉ុប នឹងពិភាក្សាពីលទ្ធភាពនៃដំណោះស្រាយការទូតចំពោះជម្លោះនេះ។ 

លោកស្រី Kallas បាននិយាយថា៖«រដ្ឋមន្ត្រីផ្តោតយ៉ាងខ្លាំងទៅលើដំណោះស្រាយការទូត។ ម្យ៉ាងវិញទៀត ក្តីបារម្ភនៃការសងសឹក នៅពេលដែលសង្រ្គាមនេះ កំពុងកើនឡើង គឺមានទំហំធំ។ ជាពិសេស ការបិទច្រកសមុទ្រ Hormuz ដោយអ៊ីរ៉ង់ គឺជាអ្វីមួយដែលនឹងមានគ្រោះថ្នាក់យ៉ាងធ្ងន់ធ្ងរ ហើយមិនល្អសម្រាប់នរណាម្នាក់នោះទេ»។ 

លោកស្រី ក៏បានអនុញ្ញាតឲ្យមានការដាក់ទណ្ឌកម្មថ្មីរបស់សហភាពអឺរ៉ុបប្រឆាំងនឹងអ៊ីរ៉ង់ ដើម្បីធានាថា   ទីក្រុងតេអេរ៉ង់ មិនបន្តកម្មវិធីនុយក្លេអ៊ែររបស់ខ្លួនឡើងវិញឡើយ។

លោកស្រី Kallas បានលើកឡើងថា៖«យើងស្ថិតនៅក្នុង ផែនការសកម្មភាពគ្រប់ជ្រុងជ្រោយរួម (JCPOA) យើងមានកាតព្វកិច្ចជាក់ស្តែង ហើយជាការពិតណាស់ យើងមានយន្តការកញ្ចប់ទណ្ឌកម្មនេះ ដែលដាក់ត្រឡប់មក លើអ៊ីរ៉ង់វិញ ប្រសិនបើគ្មានការកែលម្អលើស្ថានភាពជាមួយកម្មវិធីនុយក្លេអ៊ែរ ហើយពិតណាស់ នោះមានន័យថា សេដ្ឋកិច្ចរបស់អ៊ីរ៉ង់ ពិតជាដំណើរការមិនបានល្អទេ ហើយវាក៏មិនល្អសម្រាប់ប្រជាជនអ៊ីរ៉ង់ដែរ។ ជាការពិតណាស់ កម្មវិធីនុយក្លេអ៊ែរ គឺជារឿងដ៏សំខាន់មួយ ដែលប្រទេសអ៊ីរ៉ង់ មិនគួរមានទេ ដូច្នេះយើងត្រូវតែធ្វើការឆ្ពោះទៅរកដំណោះស្រាយចំពោះបញ្ហានេះ»។