យោធាអ៊ីស្រាអែលបានប្រាប់ឲ្យដឹងថា អ៊ីរ៉ង់បានបាញ់មីស៊ីលបន្តគ្នា នៅថ្ងៃអង្គារ (ទី២៤ ខែមិថុនា) នេះ ដោយសេវាសង្គ្រោះបន្ទាន់រាយការណ៍ថា មនុស្ស ៣នាក់ត្រូវបានសម្លាប់ ដែលនេះកើតមានឡើងត្រឹមតែប៉ុន្មានម៉ោងបន្ទាប់ពីប្រធានាធិបតីអាមេរិក លោក Donald Trump បានប្រកាសបទឈប់បាញ់ពេញលេញរវាងអ៊ីស្រាអែល និងអ៊ីរ៉ង់ ពោលគឺជាកិច្ចព្រមព្រមបញ្ចប់សង្រ្គាមរយៈពេល ១២ថ្ងៃ។

បើតាមសាក្សី បានឲ្យដឹងថា សំឡេងផ្ទុះត្រូវបានឮនៅជិតទីក្រុង Tel Aviv និង Beersheba នៅភាគខាងត្បូងនៃប្រទេសអ៊ីស្រាអែល ខណៈដែលយោធាអ៊ីស្រាអែលបានប្រាប់ថា មីស៊ីលចំនួន ៦គ្រាប់ត្រូវបានបាញ់ដោយអ៊ីរ៉ង់ ហើយសេវារថយន្តសង្គ្រោះជាតិរបស់អ៊ីស្រាអែលបាននិយាយថា មនុស្ស ៣នាក់ បានបាត់បង់ជីវិត នៅទីក្រុង Beersheba ដោយនេះជាការស្លាប់ដំបូងនៅអ៊ីស្រាអែល គិតចាប់តាំងពីលោក Trump បានប្រកាសបទឈប់បាញ់ កាលពីយប់ថ្ងៃចន្ទ (ទី២៣ ខែមិថុនា)។

មន្ត្រីសេតវិមានជាន់ខ្ពស់ម្នាក់ បានបញ្ជាក់ថា លោក Trump បានសម្របសម្រួលឲ្យឈានដល់បទឈប់បាញ់ អំឡុងពេលជជែកតាមទូរសព្ទជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu ហើយអ៊ីស្រាអែលបានយល់ព្រម ដរាបណាអ៊ីរ៉ង់មិនបើកការវាយប្រហារបន្ថែមទៀត។

លោក Trump បានសរសេរនៅលើបណ្ដាញសង្គម Truth Social ថា៖ «តាមការសន្មត គ្រប់យ៉ាងដំណើរការទៅតាមអ្វីដែលវាគួរតែបែបនោះ ខ្ញុំសូមអបអរសាទរដល់ប្រទេសទាំង២ អ៊ីស្រាអែល និងអ៊ីរ៉ង់ ដែលមានភាពរឹងមាំ ភាពក្លាហាន និងភាពវៃឆ្លាត ដើម្បីបញ្ចប់នូវអ្វីដែលគួរហៅថា សង្រ្គាម ១២ថ្ងៃ»។

តែយ៉ាងណាក្ដី មន្ត្រីអ៊ីរ៉ង់ម្នាក់បានអះអាងនៅមុននេះថា ទីក្រុងតេអេរ៉ង់បានយល់ព្រមលើបទឈប់បាញ់ ប៉ុន្តែរដ្ឋមន្ត្រីការបរទេសរបស់ប្រទេសនេះ បានសង្កត់ធ្ងន់ថា នឹងមិនមានការបញ្ចប់អរិភាពនោះឡើយ ប្រសិនបើអ៊ីស្រាអែលបញ្ឈប់ការវាយប្រហាររបស់ខ្លួន៕