ប្រធានាធិបតីរុស្ស៊ី លោក Vladimir Putin បាននិយាយកាលពីថ្ងៃចន្ទ (ទី២៣ ខែមិថុនា)ថា ការផលិតដ៏ច្រើននូវមីស៊ីលបាលីស្ទិក Oreshnik កំពុងដំណើរការ ខណៈដែលលោកបានគូសបញ្ជាក់ពីការពង្រឹងសមត្ថភាពប្រយុទ្ធជា «កិច្ចការបន្ទាន់»។

អំឡុងពេលថ្លែងសុន្ទរកថាក្នុងជំនួបជាមួយនិស្សិតបញ្ចប់ការសិក្សានសសាកលវិទ្យាល័យយោធា នៅវិមានក្រឹមឡាំង លោក Putin បានគូសបញ្ជាក់ពីការបង្កើនសមត្ថភាពប្រយុទ្ធនៃគ្រប់ផ្នែកនៃយោធារុស្ស៊ី ហើយបានរំលឹកថា អង្គភាពដាច់ដោយឡែកនៃកងទ័ពដែលទាក់ទងនឹងសង្គ្រាមយានដ្រូន កំពុងត្រូវបានបង្កើតឡើង។

ដោយកំណត់ការធ្វើទំនើបកម្មបច្ចេកទេសរបស់កងទ័ព និងកងទ័ពជើងទឹកថា ជា «វិស័យអាទិភាពមួយ» លោក Putin បានបញ្ជាក់ថា វាជាផ្នែកមួយនៃកម្មវិធីអាវុធរដ្ឋខ្នាតធំ និងរយៈពេលវែងថ្មី សម្រាប់ឆ្នាំ ២០២៧-២០៣៦។

លោកប្រធានាធិបតីបានសង្កត់ធ្ងន់ថា ប្រទេសរុស្ស៊ីនឹងយកចិត្តទុកដាក់ជាពិសេស ចំពោះនុយក្លេអ៊ែរ ៣វិស័យរបស់ខ្លួន ដោយបន្ថែមថា កងកម្លាំងរ៉ូកែតយុទ្ធសាស្ត្រ នឹងត្រូវបានផ្គត់ផ្គង់ដោយប្រព័ន្ធមីស៊ីល Yars ទំនើប ហើយផ្នែកអាកាសនៃកងកម្លាំងនុយក្លេអ៊ែរយុទ្ធសាស្ត្រ នឹងត្រូវបានបំពេញបន្ថែមដោយយន្តហោះទម្លាក់គ្រាប់បែកយុទ្ធសាស្ត្រ Tu-160M ដ៏ទំនើប នៅឆ្នាំនេះ។

គួរដឹងថា រុស្ស៊ីបានប្រើមីស៊ីល Oreshnik ជាលើកដំបូង ក្នុងខែវិច្ឆិកា ឆ្នាំ២០២៤ នៅពេលដែលលោក Putin បានប្រកាសថា ទីក្រុងមូស្គូ បានវាយប្រហាររោងចក្រមួយនៅក្នុងទីក្រុង Dnipro របស់អ៊ុយក្រែន ដោយប្រើមីស៊ីលរយៈចម្ងាយមធ្យម ដើម្បីឆ្លើយតបទៅនឹងការប្រើប្រាស់អាវុធរយៈចម្ងាយឆ្ងាយរបស់ទីក្រុងគីវ ដែលផ្គត់ផ្គង់ដោយលោកខាងលិច នៅលើដែនដីរុស្ស៊ី៕