មន្ត្រីរដ្ឋាភិបាលមួយរូប បាននិយាយកាលពីថ្ងៃចន្ទថា ប្រទេសអាល្លឺម៉ង់ មិនគាំទ្រការអំពាវនាវឲ្យផ្អាកកិច្ចព្រមព្រៀងគ្រប់គ្រងទំនាក់ទំនងរបស់អ៊ីស្រាអែល ជាមួយសហភាពអឺរ៉ុប (EU) នោះទេ ដោយនេះបានបង្ហាញពីការបែកបាក់គ្នា នៅក្នុងប្លុកនេះ។

មានការព្រួយបារម្ភកាន់តែខ្លាំងឡើង នៅក្នុងរដ្ឋធានីអ៊ឺរ៉ុប ក្នុងរយៈពេលប៉ុន្មានខែថ្មីៗនេះ អំពីប្រតិបត្តិការយោធារបស់អ៊ីស្រាអែល នៅតំបន់ហ្កាហ្សា និងស្ថានភាពមនុស្សធម៌ នៅក្នុងដែនដីនេះ។

រដ្ឋមន្ត្រីការបរទេសអេស្ប៉ាញ បានប្រាប់កាលពីថ្ងៃចន្ទថា លោកនឹងស្នើឲ្យក្រុមប្រឹក្សា EU អនុម័តការផ្អាកជាបន្ទាន់នូវកិច្ចព្រមព្រៀងសមាគម EU និងអ៊ីស្រាអែល ជាការតវ៉ា ចំពោះអ្វីដែលលោកហៅថា ជាការរំលោភសិទ្ធិមនុស្សនៅក្នុងតំបន់ហ្កាហ្សា។

សេវាការទូតរបស់ប្លុកនេះ ក៏បានលើកឡើងកាលពីថ្ងៃសុក្រសប្តាហ៍មុនថា អ៊ីស្រាអែលប្រហែលជាបានបំពានលើកាតព្វកិច្ចសិទ្ធិមនុស្សរបស់ខ្លួន នៅតំបន់ហ្កាហ្សា និងតំបន់វេសបែង ក្រោមកិច្ចព្រមព្រៀងនេះ។ អ៊ីស្រាអែលបានច្រានចោលរបាយការណ៍ដែលថា ជា«ការបរាជ័យផ្នែកសីលធម៌ និងវិធីសាស្ត្រ»។

មន្ត្រីរូបនេះ បាននិយាយនៅក្នុងសន្និសីទសង្ខេបរបស់រដ្ឋាភិបាលអាល្លឺម៉ង់ថា៖«ជំហររបស់យើង គឺច្បាស់ណាស់ថា យើងមិនគាំទ្រទាំងការផ្អាក ឬការព្យួរដោយផ្នែកឡើយ»៕