រដ្ឋមន្ត្រីការពារជាតិលោក Ruben Brekelmans បាននិយាយនៅថ្ងៃអង្គារនេះថា ប្រទេសហូឡង់ នឹង   ផ្តល់ឲ្យអ៊ុយក្រែននូវរ៉ាដាចាប់សញ្ញាយានដ្រូនចំនួន ១០០គ្រឿង និងរថយន្តជម្លៀសវេជ្ជសាស្រ្តចំនួន ២០គ្រឿង ដែលជាផ្នែកនៃកញ្ចប់ជំនួយថ្មីចំនួន ១៧៥ លានអឺរ៉ូ ( ២០២ លានដុល្លារ)។ 

ការបញ្ជូនរ៉ាដាដែលនឹងជួយកំណត់អត្តសញ្ញាណយានដ្រូនដែលចូលមក និងបញ្ជូនទិន្នន័យទៅកាន់ប្រព័ន្ធការពារដែនអាកាស ត្រូវបានគេរំពឹងថា នឹងបញ្ចប់នៅចុងឆ្នាំនេះ។

នៅក្នុងសេចក្តីថ្លែងការណ៍មួយកាលពីថ្ងៃសុក្រសប្តាហ៍មុន ក្រសួងការពារជាតិរបស់ប្រទេសហូឡង់ បានបញ្ជាក់ថា កញ្ចប់ថវិកាចំនួន ៨០លានអឺរ៉ូ នឹងបន្តគាំទ្រដល់យានដ្រូន តាមរយៈសម្ព័ន្ធយានដ្រូនអន្តរ    ជាតិ។

លោក Brekelmans បានថ្លែងនៅមុនកិច្ចប្រជុំកំពូលអង្គការណាតូ នៅទីក្រុងឡាអេថា ការសម្រេចនៅថ្ងៃអង្គារនេះ ធ្វើឡើង បន្ទាប់ពីកិច្ចព្រមព្រៀង ៥០០លានអឺរ៉ូ ដើម្បីផលិតយានដ្រូនចំនួន ៦00.000គ្រឿងជាមួយឧស្សាហកម្មការពារជាតិអ៊ុយក្រែន។

ប្រទេសហូឡង់ បានសន្យាផ្តល់ជំនួយផ្នែកយោធាប្រហែល ១០ពាន់លានអឺរ៉ូសម្រាប់អ៊ុយក្រែន ចាប់តាំងពីការចាប់ផ្តើមនៃការឈ្លានពានរបស់រុស្ស៊ីពេញលេញ នៅដើមឆ្នាំ ២០២២។