វិមានក្រឹមឡាំង នៅថ្ងៃអង្គារ (ទី២៤ ខែមិថុនា) បានប្រាប់ឲ្យដឹងថា ប្រទេសរុស្ស៊ីបានគាំទ្រអ៊ីរ៉ង់ «ជាមួយនឹងការមានជំហរច្បាស់លាស់» ដោយបានថ្កោលទោសការវាយប្រហាររបស់សហរដ្ឋអាមេរិក និងអ៊ីស្រាអែល លើទីតាំងនុយក្លេអ៊ែរអ៊ីរ៉ង់ ហើយថា ទីក្រុងមូស្គូមានបំណងលើកកម្ពស់ទំនាក់ទំនងរបស់ខ្លួនបន្ថែមទៀតជាមួយទីក្រុងតេអេរ៉ង់។

អ្នកនាំពាក្យវិមានក្រឹមឡាំង លោក Dmitry Peskov កំពុងឆ្លើយតបទៅនឹងសំណួរ ពាក់ព័ន្ធនឹងការរិះគន់ពីសំណាក់អ្នកអត្ថាធិប្បាយមួយចំនួន ដែលបានលើកឡើងថា រុស្ស៊ីមិនបានធ្វើឲ្យបានគ្រប់គ្រាន់នោះឡើយ ក្នុងការគាំទ្រអ៊ីរ៉ង់ ដែលខ្លួនមានកតិកាសញ្ញាភាពជាដៃគូយុទ្ធសាស្ត្រ។

លោក Peskov បានបញ្ជាក់ថា៖ «មនុស្សជាច្រើនកំពុងព្យាយាមធ្វើឲ្យខូចដល់ទំនាក់ទំនង រវាងទីក្រុងមូស្គូ និងទីក្រុងតេអេរ៉ង់ ដោយការចាក់សាំងលើភ្លើងបន្ថែម»។

លោកបានកត់សម្គាល់បន្ថែមថា រដ្ឋមន្ត្រីការបរទេសអ៊ីរ៉ង់ លោក Abbas Araghchi ដែលបានជួបពិភាក្សាជាមួយលោកប្រធានាធិបតី Vladimir Putin នៅទីក្រុងមូស្គូ កាលពីថ្ងៃចន្ទ (ទី២៣ ខែមិថុនា) បាននិយាយថា លោកបានវាយតម្លៃខ្ពស់ ចំពោះតួនាទីរបស់រុស្ស៊ី។

លោក Araghchi បានថ្លែងអំណរគុណដល់លោក Putin ដែលបានថ្កោលទោសការវាយប្រហាររបស់សហរដ្ឋអាមេរិកលើអ៊ីរ៉ង់ ដោយលោកបានប្រាប់ថា ប្រទេសរុស្ស៊ីឈរនៅ «ខាងអ្នកមានភាពត្រឹមត្រូវ ក្នុងប្រវត្តិសាស្ត្រ»៕