កងទ័ពរបស់ប្រទេសជប៉ុន បានប្រកាសនាថ្ងៃអង្គារនេះថា ខ្លួនបានធ្វើតេស្តមីស៊ីលជាលើកដំបូង នៅលើទឹកដីរបស់ខ្លួន។

ការបាញ់សាកល្បងមីស៊ីលរយៈចម្ងាយខ្លីពីដីទៅលើនាវា Type-88 ត្រូវបានធ្វើឡើងនៅថ្ងៃអង្គារនេះ នៅឯទីតាំងបាញ់ប្រឆាំងយន្តហោះ Shizunai នៅលើកោះ Hokkaido ដ៏សំខាន់នៅចុងខាងជើងរបស់ប្រទេស  ជប៉ុន។

ក្រុមមន្ត្រីបាននិយាយថា សមយុទ្ធដោយកងពលតូចកាំភ្លើងធំលេខ ១ របស់កងកម្លាំងការពារដីគោក ត្រូវបានចូលរួមដោយទាហានប្រហែល ៣០០នាក់ ដែលបានបាញ់លើទូកគ្មានមនុស្សបើកនៅចម្ងាយប្រហែល ៤០ គីឡូម៉ែត្រ (២៤ម៉ាយ) ពីឆ្នេរសមុទ្រភាគខាងត្បូងនៃកោះ Hokkaido។

ពួកគេបាននិយាយថា ក្រុមមន្ត្រីនៅពិនិត្យមើលលទ្ធផលនៃការធ្វើតេស្តនេះ។

ការសាកល្បងនេះ ត្រូវបានធ្វើឡើង ខណៈដែលជប៉ុនពន្លឿនការកសាងយោធារបស់ខ្លួន ដើម្បីទទួលបានសមត្ថភាពវាយបកវិញ ដើម្បីជាការរារាំងដល់ប្រទេសចិន។

ជប៉ុនគ្រោងនឹងដាក់ពង្រាយមីស៊ីលតម្រង់គោលដៅរយៈចម្ងាយឆ្ងាយ រួមទាំងមីស៊ីល Tomahauks ចាប់ផ្តើម នៅចុងឆ្នាំនេះ។

នាពេលកន្លងទៅ ប្រទេសជប៉ុន ធ្លាប់បានធ្វើតេស្តមីស៊ីលនៅក្រៅប្រទេស រួមទាំងក្នុងទឹកដីនៃដៃគូការពាររបស់ខ្លួន ដូចជាសហរដ្ឋអាមេរិក និងអូស្ត្រាលីជាដើម។