ដំណើរការកាត់ក្តីលើមនុស្ស ៤១នាក់ ដែលរួមមានទាំងមន្ត្រីរដ្ឋផងដែរ ក្នុងសំណុំរឿងពុករលួយគិតជាទឹកប្រាក់ចំនួន ៤៥លានដុល្លារ បានចាប់ផ្តើមហើយនៅក្នុងប្រទេសវៀតណាម នាថ្ងៃអង្គារ (ទី២៤ ខែមិថុនា) នេះ ដែលជាផ្នែកនៃកិច្ចប្រឹងប្រែងប្រឆាំងអំពើពុករលួយយ៉ាងទូលំទូលាយរបស់រដ្ឋកុម្មុយនីស្ត។

យុទ្ធនាការ ដែលត្រូវបានគេឲ្យឈ្មោះថា «ឡដុតកម្ទេច» ប្រឆាំងនឹងអំពើពុករលួយ បានធ្វើឲ្យឥស្សរជនជាន់ខ្ពស់រដ្ឋាភិបាលរាប់សិបនាក់ បានបាត់បង់តួនាទី និងត្រូវបានចាប់ខ្លួន ក្នុងនោះរួមមានទាំងប្រធានាធិបតី ២រូប និងឧបនាយករដ្ឋមន្ត្រី ៣រូប ព្រមទាំងមេដឹកនាំអាជីវកម្មធំៗជាច្រើនផងដែរ។

ក្នុងករណីចុងក្រោយនេះ តុលាការនៅទីក្រុងហាណូយ បានចាប់ផ្តើមនីតិវិធី ប្រឆាំងនឹងអតីតមន្ត្រីចំនួន ៣០នាក់នៃខេត្តភាគខាងជើង Vinh Phuc, Phu Tho និងខេត្ត Quang Ngai ភាគកណ្តាល។

មនុស្ស ១១នាក់ផ្សេងទៀត ដែលជាពាណិជ្ជករ និងបុគ្គលិកក្រុមហ៊ុន ក៏ត្រូវបានចោទប្រកាន់ពីបទជាប់ពាក់ព័ន្ធក្នុងអំពើពុករលួយ ដែលរដ្ឋអាជ្ញាប្រាប់ថា បានបង្កការខូចខាតដល់រដ្ឋជាទឹកប្រាក់ជាង ១,១៦សែនកោដិដុង (៤៤,៦លានដុល្លារ)។

ជនជាប់ចោទទាំងនោះត្រូវបានចោទប្រកាន់ពីបទល្មើសជាច្រើន រួមមានស៊ីសំណូក ការរំលោភអំណាច និងការរំលោភច្បាប់ ស្តីពីការដេញថ្លៃ និងគណនេយ្យ។ រដ្ឋអាជ្ញាបានលើកឡើងថា ចន្លោះឆ្នាំ២០១០ ដល់ឆ្នាំ២០២៤ ប្រធានក្រុមហ៊ុន Phuc Son Group លោក Nguyen Van Hau បានចំណាយប្រាក់ជាង ៥លានដុល្លារ សូកប៉ាន់មន្ត្រី ដើម្បីទទួលបានកិច្ចសន្យា នៅក្នុងគម្រោងហេដ្ឋារចនាសម្ព័ន្ធចំនួន ១៤ តម្លៃរាប់ពាន់លានដុល្លារ នៅក្នុងខេត្តទាំង៣៕