ក្រុមគាំទ្រជីវពលប្រដាប់អាវុធស៊ីអ៊ីត Kataib Sayyid al-Shuhada បាននាំគ្នាអបអរសាទរនៅតាមដងផ្លូវក្នុងទីក្រុង Basra ក្រោយអ៊ីរ៉ង់វាយប្រហារលើមូលដ្ឋានទ័ពអាកាស Al Udeid របស់សហរដ្ឋអាមេរិកនៅប្រទេសកាតា ។

យោធាអ៊ីរ៉ង់និយាយថា ពួកគេបានបើកការវាយប្រហារមីស៊ីលលើមូលដ្ឋានទ័ពអាកាសអាមេរិកកាលពីថ្ងៃចន្ទ ក្រោយការផ្ទុះត្រូវបានឮនៅទូទាំងរដ្ឋធានីប្រទេសកាតា បន្ទាប់ពីការគំរាមសងសឹករបស់ទីក្រុងតេអេរ៉ង់ចំពោះការវាយប្រហាររបស់សហរដ្ឋអាមេរិកលើទីតាំងនុយក្លេអ៊ែររបស់ពួកគេ ។

យោធាអ៊ីរ៉ង់ និយាយថា ការវាយប្រហារនេះមានកម្លាំងខ្លាំង ប៉ុន្តែក្រុមមន្រ្តីសហរដ្ឋអាមេរិកនិយាយថា គ្មានមន្រ្តីអាមេរិករូបណា ត្រូវបានសម្លាប់ ឬរងរបួសនោះឡើយ នៅក្នុងការវាយប្រហារលើមូលដ្ឋានទ័ពអាកាស ដែលជាមូលដ្ឋានទ័ពធំជាងគេបំផុតរបស់អាមេរិកនៅតំបន់មជ្ឈិមបូព៌ា ។

អ៊ីរ៉ង់ដែលត្រូវបានព្រមានដោយទីក្រុងវ៉ាស៊ីនតោនថាមិនត្រូវសងសឹក បើពុំដូច្នោះទេនឹងប្រឈមវិធានការយោធាទ្រង់ទ្រាយធំរបស់អាមេរិកនោះ បានជូនដំណឹងទៅសហរដ្ឋអាមេរិក តាមរយៈបណ្តាញការទូតចំនួន ២ រយៈពេលច្រើនម៉ោងមុនការវាយប្រហារ ក៏ដូចជាជូនដំណឹងទៅកាន់ក្រុមអាជ្ញាធរកាតា ៕