វិមានក្រឹមឡាំង នៅថ្ងៃអង្គារ (ទី២៤ ខែមិថុនា) នេះ បានលើកឡើងថា អង្គការណាតូ (NATO) កំពុងស្ថិតនៅលើផ្លូវនៃយោធូបនីកម្មហួសពីការគ្រប់គ្រងបាន ហើយបានបង្កើតរូបភាព ដែលថា ប្រទេសរុស្ស៊ី គឺជា «គូអរិដ៏គួរឲ្យខ្លាច» ដើម្បីបង្ហាញពីភាពត្រឹមត្រូវនៃការប្តេជ្ញាចិត្ត ចំពោះការបង្កើនយ៉ាងច្រើននូវការចំណាយលើវិស័យការពារជាតិរបស់ប្រទេសសមាជិក។

បណ្ដាមេដឹកនាំអង្គការណាតូ ដែលកំពុងចាប់ផ្តើមកិច្ចប្រជុំកំពូលចំនួន ២ នៅប្រទេសហូឡង់ បាននិយាយថា រុស្ស៊ីអាចវាយប្រហាររដ្ឋជាសមាជិករបស់អង្គការណាតូណាមួយ ក្នុងរយៈពេលប៉ុន្មានឆ្នាំខាងមុខ ប្រសិនបើទីក្រុងមូស្គូមិនត្រូវបានបញ្ឈប់មិនឲ្យគ្រប់គ្រងលើអ៊ុយក្រែនទេនោះ។

រុស្ស៊ីបដិសេធផែនការវាយប្រហាររដ្ឋសមាជិកអង្គការណាតូ ប៉ុន្តែអ្នកនាំពាក្យវិមានក្រឹមឡាំង លោក Dmitry Peskov បាននិយាយថា វាជា «កិច្ចប្រឹងប្រែងដ៏ខ្ជះខ្ជាយ» ក្នុងការធានាដល់សម្ព័ន្ធភាពនូវរឿងបែបនេះ ព្រោះវាត្រូវបានកំណត់ថា មានការគំរាមកំហែងពីរុស្ស៊ី។

លោកបាននិយាយថា៖ «នេះគឺជាសម្ព័ន្ធមិត្តដែលបង្កើតឲ្យមានការប្រឈមមុខគ្នា។ នេះមិនមែនជាឧបករណ៍បង្កើតឲ្យសន្តិភាព និងស្ថិរភាពនោះទេ»។ លោកបានកត់សម្គាល់ពីចេតនារបស់អង្គការណាតូ ក្នុងការធ្វើឲ្យសមាជិកប្តេជ្ញាចំពោះការចំណាយ ៥ភាគយយនៃផលិតផលក្នុងស្រុកសរុប (GDP) របស់ពួកគេ លើវិស័យការពារជាតិ តាមការទាមទាររបស់លោកប្រធានាធិបតីអាមេរិក Donald Trump។

លោក Peskov បានសង្កត់ធ្ងន់ថា៖ «សម្ព័ន្ធភាពយោធានេះកំពុងធ្វើដំណើរប្រកបដោយទំនុកចិត្តលើផ្លូវនៃយោធូបនីកម្មហួសពីការគ្រប់គ្រងបាន»។ លោកបានបន្ថែមថា៖ «ដើម្បីជំរុញគោលដៅ ៥ភាគរយ វាគឺជារឿងចាំបាច់ដែលអង្គការណាតូត្រូវប្រឌិតការគំរាមកំហែងដ៏គួរឲ្យខ្លាច។ ដើម្បីធ្វើដូច្នេះបាន អ្នកត្រូវបង្កើតរូបភាពដ៏គួរឲ្យខ្លាច។ ហើយក្នុងទស្សនវិស័យរបស់មន្ត្រីអង្គការណាតូ ប្រទេសរបស់យើង គឺស័ក្ដិសមបំផុត សម្រាប់តួនាទីជាអ្នកគំរាមកំហែង»៕