ប្រធានគណៈកម្មការអឺរ៉ុប លោកស្រី Ursula von der Leyen បាននិយាយនៅថ្ងៃអង្គារ (ទី២៤ ខែមិថុនា) នេះថា វិស័យការពារជាតិអឺរ៉ុប នៅទីបំផុតបានងើបឡើងហើយ ពោលគឺត្រូវបានយកចិត្តទុកដាក់យ៉ាងប្រាកដប្រជា ដោយសារតែសង្រ្គាមរបស់រុស្ស៊ី លើអ៊ុយក្រែន ដោយលោកស្រីបានបន្ថែមថា អឺរ៉ុបឥឡូវនេះត្រូវតែបន្តកិច្ចប្រឹងប្រែងរបស់ខ្លួន ទាក់ទងនឹងនវានុវត្តន៍ និងហិរញ្ញប្បទាន។

នៅមុនកិច្ចប្រជុំកំពូលរយៈពេល ២ថ្ងៃរបស់អង្គការណាតូ (NATO) នៅទីក្រុងឡាអេ ប្រទេសហូឡង់ លោកស្រី von der Leyen បានប្រាប់អ្នកសារព័ត៌មានថា៖ «ប្រទេសតំបន់អឺរ៉ុបទាំងអស់ កំពុងប្រឈមមុខនឹងការផ្លាស់ប្តូរទិដ្ឋភាពអន្តរជាតិ ដូចដែលយើងទើបតែបានដឹងឮ»។ 

លោកស្រីបានបញ្ជាក់ទៀតថា៖ «ប្រព័ន្ធសន្តិសុខដែលយើងពឹងផ្អែកអស់ជាច្រើនទសវត្សរ៍មក លែងអាចទទួលបានការធានាទៀតហើយ។ វាគឺជាការផ្លាស់ប្តូរមួយជំនាន់ដ៏កម្រ និងមានទំហំធំណាស់។ ប៉ុន្តែក្នុងរយៈពេលប៉ុន្មានខែថ្មីៗនេះ អឺរ៉ុបបានចាត់វិធានការ ជាចំណាត់ការដែលហាក់ដូចជាមិននឹកស្មានដល់សោះ កាលពី ១ឆ្នាំមុន»។

លោក von der Leyen បានបន្ថែមថា៖ «វិស័យការពារជាតិអឺរ៉ុប បានងើបឡើងហើយ។ នៅថ្ងៃស្អែក កិច្ចប្រជុំកំពូល នឹងកំណត់គោលដៅចំណាយថ្មីជាប្រវត្តិសាស្ត្រ សម្រាប់សម្ព័ន្ធមិត្តណាតូ»៕