ក្រោយក្តីភ័យខ្លាច និងភាពពុំច្បាស់លាស់មួយយប់ បន្ទាប់ពីការវាយប្រហាររបស់អ៊ីរ៉ង់លើមូលដ្ឋានយោធាសហរដ្ឋអាមេរិកនៅក្នុងប្រទេសកាតា ជីវិតនៅក្នុងរដ្ឋឈូងសមុទ្រមួយនេះ បានវិលត្រឡប់មករកប្រក្រតីភាពវិញហើយ ។

អ៊ីរ៉ង់បានបាញ់មីស៊ីល ១៩គ្រាប់លើមូលដ្ឋានទ័ពអាកាស Al Udeid របស់សហរដ្ឋអាមេរិកកាលពីថ្ងៃចន្ទ ។ 

ក្រុមមន្រ្តីក្រសួងមហាផ្ទៃកាតា បញ្ជាក់រយៈពេលប៉ុន្មានម៉ោងក្រោយការវាយប្រហារនេះថា កងកម្លាំងការពារជាតិកាតា បានបាញ់ស្កាត់មីស៊ីល ១៨គ្រាប់ ។

មូលដ្ឋានទ័ពនេះ ស្ថិតនៅចម្ងាយ ៣៥គ.មពីទីក្រុងដូហា ប៉ុន្តែមីស៊ីលបានហោះរំលងរដ្ឋធានីមួយនេះ ជាហេតុបណ្តាលមានភាពតានតឹងកើតឡើង ។

ប៉ុន្មានម៉ោងមុនការវាយប្រហារ សហរដ្ឋអាមេរិក និងអង់គ្លេស បានណែនាំឲ្យពលរដ្ឋរបស់ខ្លួនស្វែងរកទីជម្រកគ្រាប់បែក ។

កាតាបានបិទដែនអាកាសរបស់ខ្លួន និងប្រកាសថា សាលារៀនត្រូវបិទទ្វារផងដែរនៅថ្ងៃអង្គារនេះ ខណៈមនុស្សជាច្រើន ត្រូវបានណែនាំឲ្យធ្វើការពីផ្ទះ ។

ទោះបីជាយ៉ាងណាក៏ដោយ រយៈពេល ១២ម៉ោងក្រោយការវាយប្រហារ ផ្លូវនៅក្នុង និងជុំវិញទីក្រុងដូហា មើលឃើញលំហូរធ្វើដំណើរវិញហើយ ហើយភាគច្រើននៃអ្នកស្រុក លែងមានការព្រួយបារម្ភដូចពេលដែលពួកគេបានជួបប្រទះកាលពី ១យប់មុន ៕