ទំនុកចិត្តអ្នកប្រើប្រាស់របស់សហរដ្ឋអាមេរិក បានធ្លាក់ចុះដោយមិននឹកស្មានដល់ក្នុងខែមិថុនា ព្រោះតែក្រុមគ្រួសារព្រួយបារម្ភកាន់តែខ្លាំងឡើងពីលទ្ធភាពទទួលបានការងារធ្វើ ដែលជាការចង្អុលបង្ហាញដ៏អាក្រក់មួយផ្សេងទៀត ដែលថាលក្ខខណ្ឌទីផ្សារការងារកំពុងធ្លាក់ចុះ ជុំវិញកំណើនភាពមិនប្រាកដប្រជានៃសេដ្ឋកិច្ច ដោយសារតែពន្ធខ្ពស់ៗរបស់រដ្ឋបាលលោកប្រធានាធិបតី Donald Trump។

ការថយចុះជាលំដាប់នៃទំនុកចិត្តអ្នកប្រើប្រាស់នេះ ដែលបានរាយការណ៍ដោយក្រុមប្រឹក្សាសន្និសិទកាលពីថ្ងៃអង្គារ (២៤ មិថុនា) គឺកើតឡើងលើទូទាំងក្រុមអាយុទាំងអស់ និងស្ទើរតែគ្រប់ក្រុមចំណូលរបស់ជនជាតិអាមេរិក ហើយក៏នៅទូទាំងវិសាលគមនយោបាយ ជាមួយនឹងការធ្លាក់ចុះដ៏ធំបំផុតក្នុងចំណោមសមាជិកបក្សសាធារណរដ្ឋ។

សន្ទស្សន៍ទំនុកចិត្តអ្នកប្រើប្រាស់របស់ក្រុមប្រឹក្សាសន្និសីទ បានបង្ហាញការធ្លាក់ចុះ ៥,៤ពិន្ទុ នៅត្រឹមតួលេខ ៩៣,០ ក្នុងខែនេះ ដោយលុបបំបាត់ជិតពាក់កណ្តាលនៃកំណើនយ៉ាងខ្លាំងក្នុងខែឧសភា។ សេដ្ឋវិទូដែលត្រូវស្ទង់មតិដោយសារព័ត៌មានរ៉យទ័រធ្លាប់ព្យាករថា សន្ទស្សន៍អាចកើនដល់ ១០០,០ពិន្ទុ។ សេដ្ឋវិទូនិយាយថា រួមជាមួយនឹងចំនួនប្រជាជនដ៏ច្រើនដែលពឹងផ្អែកលើអត្ថប្រយោជន៍អត់ការងារធ្វើ បានបង្កើនហានិភ័យដល់អត្រាគ្មានការងារ ដែលអាចកើនឡើងដល់ ៤,៣% ក្នុងខែមិថុនា ពីអត្រា ៤,២% ក្នុងខែឧសភា។

អ្នកប្រើប្រាស់នៅតែបារម្ភលើពន្ធនាំចូលខ្ពស់ ហើយភាគច្រើនមិនទាន់សម្រេចចិត្តលើការចំណាយធំៗ។ មានការធ្លាក់ចុះនៃអត្រាប្រជាជនអាមេរិក ដែលរំពឹងថាប្រាក់ចំណូលរបស់ពួកគេនឹងកើនឡើង ទោះបីជាការយល់ឃើញពីស្ថានភាពហិរញ្ញវត្ថុបច្ចុប្បន្ននៅតែរឹងមាំក៏ដោយ៕