ប្រធានាធិបតីអាមេរិក លោក Donald Trump បានចេញមុខច្រានចោលរបាយការណ៍ប្រព័ន្ធផ្សព្វផ្សាយ ដែលអះអាងថា ការវាយប្រហារតាមច្រកអាកាសរបស់សហរដ្ឋអាមេរិក លើអ៊ីរ៉ង់ មិនបានជោគជ័យក្នុងការបំផ្លាញហេដ្ឋារចនាសម្ព័ន្ធនុយក្លេអ៊ែររបស់ទីក្រុងតេអេរ៉ង់ឡើយ។

ដោយហៅដំណឹងនោះថា "ព័ត៌មានក្លែងក្លាយ" លោក Trump បានបង្ហោះលើបណ្ដាញសង្គម Truth Social ថា គោលដៅត្រូវបាន "បំផ្លាញទាំងស្រុង" ដោយផ្ទុយទៅនឹងការវាយតម្លៃចារកម្មបឋម ដែលបង្ហាញថា ការវាយប្រហារនោះគ្រាន់តែអាចពន្យឺតកម្មវិធីនុយក្លេអ៊ែររបស់ទីក្រុងតេអេរ៉ង់ ឱ្យដើរថយក្រោយត្រឹមពីរបីខែប៉ុណ្ណោះ។

លោក Trump បានបង្ហោះសារថា៖ "ព័ត៌មានក្លែងក្លាយ CNN រួមជាមួយនឹងកាសែត New York Times ដ៏បរាជ័យ បានសហការគ្នាក្នុងការប៉ុនប៉ងបង្ខូចការវាយប្រហារដ៏ជោគជ័យបំផុតមួយក្នុងប្រវត្តិសាស្ត្រដោយយោធាអាមេរិក។ ទីតាំងនុយក្លេអ៊ែរនៅអ៊ីរ៉ង់ ត្រូវបំផ្លាញទាំងស្រុង! ទាំងកាសែត The Times និង CNN កំពុងទទួលរងការរិះគន់ពីសាធារណជន!"។

នៅមុននោះ អ្នកនាំពាក្យសេតវិមាន លោកស្រី Karoline Leavitt ក៏បានច្រានចោលរបាយការណ៍នេះផងដែរនៅក្នុងសេចក្តីថ្លែងការណ៍យ៉ាងខឹងសម្បារមួយ ដោយហៅថាជាព័ត៌មាន "បំភ្លៃទាំងស្រុង"។

គួរឱ្យដឹងថា សារព័ត៌មាន CNN បានរាយការណ៍ដំបូងគេថា របាយការណ៍ពីទីភ្នាក់ងារចារកម្មសម្ងាត់ការពារជាតិ (DIA) បាននិយាយថា ការវាយប្រហាររបស់យោធាសហរដ្ឋអាមេរិក ទៅលើទីតាំងនុយក្លេអ៊ែរចំនួន៣ របស់អ៊ីរ៉ង់ — គឺ Fordo, Natanz និង Isfahan — មិនបានបំផ្លាញសមាសធាតុស្នូលនៃកម្មវិធីនុយក្លេអ៊ែររបស់ប្រទេសនេះទេ ហើយទំនងជាធ្វើឱ្យកម្មវិធីដ៏គ្រោះថ្នាក់នេះដើរថយក្រោយត្រឹមតែប៉ុន្មានខែប៉ុណ្ណោះ៕