ប្រមុខនុយក្លេអ៊ែររបស់អ៊ីរ៉ង់ លោក Mohammad Eslami បាននិយាយកាលពីថ្ងៃអង្គារ (២៤ មិថុនា) ថា ទីក្រុងតេអេរ៉ង់ កំពុងវាយតម្លៃការខូចខាតចំពោះឧស្សាហកម្មនុយក្លេអ៊ែររបស់ខ្លួន បន្ទាប់ពីយុទ្ធនាការរយៈពេល ១២ថ្ងៃដ៏ខ្លាំងក្លារបស់អ៊ីស្រាអែល ប្រឆាំងនឹងរោងចក្រទាំងនោះ ហើយការរៀបចំកំពុងត្រូវបានធ្វើឡើងសម្រាប់ការស្តារកម្មវិធីនុយក្លេអ៊ែរឡើងវិញ។

សារព័ត៌មាន Mehr News គ្រប់គ្រងដោយរដ្ឋរបស់អ៊ីរ៉ង់ បានរាយការណ៍ថា លោក Eslami បានលើកឡើងថា "ផែនការស្ដារឡើងវិញនេះគឺដើម្បីទប់ស្កាត់ការរំខាននៅក្នុងដំណើរការផលិតកម្ម និងសេវាកម្ម" ដោយអះអាងថា ទីក្រុងតេអេរ៉ង់ បានត្រៀមលក្ខណៈទុកជាមុនរួចស្រេចទៅហើយសម្រាប់ការខូចខាតដល់ទីតាំងនុយក្លេអ៊ែរបែបនេះ។

កម្មវិធីនុយក្លេអ៊ែររបស់អ៊ីរ៉ង់ បានរងការវាយប្រហារយ៉ាងធ្ងន់ធ្ងរក្នុងការទម្លាក់គ្រាប់បែករបស់អ៊ីស្រាអែល ចាប់តាំងពីថ្ងៃទី១៣ ខែមិថុនា មក ហើយជាពិសេសនៅព្រឹកថ្ងៃអាទិត្យចុងសប្ដាហ៍មុន នៅពេលសហរដ្ឋអាមេរិក ទម្លាក់គ្រាប់បែកឃួងបំផ្ទុះគោលដៅក្រោមដីដ៏ធំ និងបាញ់មីស៊ីលដាក់ទីតាំងនុយក្លេអ៊ែរចំនួន៣ របស់ខ្លួន ដោយចូលរួមក្នុងយុទ្ធនាការរបស់អ៊ីស្រាអែល។

អាមេរិក និងអ៊ីស្រាអែលអះអាងថា ការទម្លាក់គ្រាប់បែករបស់ពួកគេបានបង្កការខូចខាតយ៉ាងសំខាន់ដល់មហិច្ឆតានុយក្លេអ៊ែររបស់អ៊ីរ៉ង់ និងធ្វើឱ្យកម្មវិធីនុយក្លេអ៊ែររបស់ប្រទេសនេះដើរថយក្រោយក្នុងរយៈពេលដ៏ធំ។ ប៉ុន្តែសារព័ត៌មាន CNN បានរាយការណ៍សម្អាងដល់ចារកម្មសម្ងាត់បឋមមួយថា ការវាយប្រហាររបស់អាមេរិក លើទីតាំងនុយក្លេអ៊ែរចំនួន៣ របស់អ៊ីរ៉ង់ — គឺ Fordo, Natanz និង Isfahan — មិនបានបំផ្លាញសមាសធាតុស្នូលនៃកម្មវិធីនុយក្លេអ៊ែររបស់ប្រទេសនេះទេ ហើយទំនងជាធ្វើឱ្យកម្មវិធីដ៏គ្រោះថ្នាក់នេះដើរថយក្រោយត្រឹមប៉ុន្មានខែប៉ុណ្ណោះ៕