បាល់ទាត់៖ បន្ទាប់ពីធ្វើការរុះរើដោយមិនបន្ដកុងត្រាកីឡាករជាច្រើនរូប ពេលនេះក្លិបគិរីវង់សុខសែនជ័យបានប្រកាសចែកផ្លូវជាមួយគ្រូបង្គោលលោក Ekapob Putisai និងគ្រួជំនួយម្នាក់គឺលោកស្រី Chataya Potisai ហើយ ក្រោយចំណាយពេលដឹកនាំក្រុមមានមូលដ្ឋាននៅខេត្តតាកែវនេះអស់រយៈពេល ៣ឆ្នាំកន្លងមក។
ការចែកផ្លូវជាមួយក្រុមគ្រូបង្វឹក និងគ្រូជំនួយជនជាតិថៃនេះ ដោយសារក្លិបមិនសូវពេញចិត្តនឹងលទ្ធផលកន្លងមក ពិសេសការប្រកួតជើងទី២ នៃលីគកំពូលកម្ពុជាឆ្នាំ២០២១ កន្លងទៅ។ ហេតុនេះទើបក្លិបសម្រេចធ្វើការផ្លាស់ប្ដូរសូម្បីតែគ្រូបង្វឹក ដើម្បីពង្រឹងការរៀបចំឆ្ពោះទៅរកភាពរីកចម្រើន និងទទួលបានលទ្ធផលល្អប្រសើរនារដូវកាលថ្មីខាងមុខ។ លោក Florian អគ្គលេខាធិការក្លិបគិរីវង់បានថ្លែងអំណរគុណ ចំពោះលោក Ekapob ដែលបានខិតខំដឹកនាំក្លិបកន្លងមក តែលោកថា ពេលនេះគឹជារដ្ឋកាថ្មីរបស់ក្លិបដើម្បីភាពរីកចម្រើន និងបោះជំហានទៅមុខបន្ថែមទៀត។ ដូច្នេះក្លិបបានសម្រេចធ្វើការផ្លាស់ប្ដូរទ្រង់ទ្រាយធំ ដើម្បីឈានទៅនាំយកកីឡាករថ្មីៗដែលមានបទពិសោធន៍ ក៏ដូចជាការលើកស្ទួយយុវជនថ្នាលរបស់ខ្លួន។
គួរដឹងថា ក្រៅពីគ្រូបង្វឹក និងគ្រូជំនួយជនជាតិថៃមកទល់ពេលនេះ ក្លិបចំណាត់ថ្នាក់លេខ៨ នៃលីគកំពូលកម្ពុជាឆ្នាំ២០២១ នេះបានប្រកាសចែកផ្លូវជាមួយកីឡាករចំនួន ១១នាក់ហើយរួមមានកីឡាករ អ៊ុយ ឡុងហួរ, ដាវ នីម, អ៊ិន សាវឌី, ឯម ផាន់ណា, ហេង បូរ៉ា, ចាន់ ឧត្តម, សេង សារ៉ាវុទ្ធី, គង់ ចាន់វុទ្ធី, កីឡាករជប៉ុន Taku, រួមទាំងកីឡាករប្រេស៊ីល Tardia និង Osmar Moreira។ រីឯការបន្ដកុងត្រាថ្មីទើបមានកីឡាករ ង៉ោង បូរី ម្នាក់ប៉ុណ្ណោះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
