ប្រជាជននៅទីក្រុងបេរូត ប្រទេសលីបង់ មួយចំនួនបានសម្តែងក្តីសង្ឃឹម អ្នកខ្លះទៀតមានមន្ទិលសង្ស័យ បន្ទាប់ពីបទឈប់បាញ់ដ៏ផុយស្រួយរវាងអ៊ីរ៉ង់ និងអ៊ីស្រាអែល បានចូលជាធរមាន។

នៅតំបន់ Corniche ទីក្រុងបេរូត ជាកន្លែងដែលមនុស្សជាច្រើនដើរ រត់លេង និងស្ទូចត្រីនៅមាត់សមុទ្រ មនុស្សមួយចំនួនបាននិយាយថាពួកគេមានជំនឿតិចតួចណាស់ថា បទឈប់បាញ់នេះនឹងនៅស្ថិតនៅជាធរមានបានយូរ។

ការផ្ទុះជាច្រើន បានបន្តកើតមាននៅក្នុងទីក្រុងតេអេរ៉ង់កាលពីថ្ងៃអង្គារ ទោះបីជាប្រធានាធិបតីសហរដ្ឋអាមេរិក លោក Donald Trump បាននិយាយថា អ៊ីស្រាអែលបានផ្អាកការវាយប្រហារតាមអាកាសតាមបញ្ជារបស់លោក ដើម្បីរក្សាបទឈប់បាញ់ដែលមានរយៈពេលជាច្រើនម៉ោង។

សាក្សីក្នុងរដ្ឋធានីប្រទេសអ៊ីរ៉ង់បាននិយាយថាពួកគេបានឮសំឡេងផ្ទុះខ្លាំងៗពីរលើក។ ជាមួយគ្នានេះ វិទ្យុកងទ័ពអ៊ីស្រាអែល បាននិយាយថា អ៊ីស្រាអែលបានវាយប្រហារលើទីតាំងរ៉ាដារបស់អ៊ីរ៉ង់នៅជិតទីក្រុងតេអេរ៉ង់។

ការិយាល័យរបស់នាយករដ្ឋមន្ត្រី លោក Benjamin Netanyahu បាននិយាយថា អ៊ីស្រាអែលពុំបានធ្វើការវាយប្រហារទៀតឡើយ បន្ទាប់ពីលោក Netanyahu បាននិយាយទៅកាន់ លោក Trump ។

លោក Trump និយាយថា អ៊ីស្រាអែលបានផ្អាកការវាយប្រហាររបស់ខ្លួន បន្ទាប់ពីលោកបានស្តីបន្ទោសឲ្យអ៊ីស្រាអែលដោយពាក្យមិនគួរសមដាក់សម្ព័ន្ធមិត្តដែលមានយុទ្ធនាការរួមគ្នាកាលពីពីរបីថ្ងៃមុននេះ។