អាជ្ញាធរតំបន់ បានបញ្ជាក់កាលពីថ្ងៃអង្គារថា ចំនួនអ្នកស្លាប់ដោយសារទឹកជំនន់ដ៏មហន្តរាយកាលពីពេលថ្មីៗនេះនៅក្នុងខេត្ត Eastern Cape របស់ប្រទេសអាហ្រ្វិកខាងត្បូង បានកើនឡើងដល់១០០នាក់ ខណៈកិច្ចខិតខំប្រឹងប្រែងស្វែងរក និងជួយសង្គ្រោះ នៅតែបន្ត។ ទឹកជំនន់ ដែលបានវាយលុកនៅទូទាំងខេត្តកាលពីដើមខែនេះ បណ្តាលឱ្យបាត់បង់ជីវិតមនុស្ស រំខានដល់ជីវភាពរស់នៅ និងបានបំផ្លាញហេដ្ឋារចនាសម្ព័ន្ធយ៉ាងច្រើន។

រដ្ឋាភិបាលខេត្ត Eastern Cape បាននិយាយនៅក្នុងសេចក្តីថ្លែងការណ៍ថា «យោងតាមរបាយការណ៍ចុងក្រោយ សាកសពចំនួន៩៤នាក់ ត្រូវបានកំណត់អត្តសញ្ញាណ និងបានប្រគល់ទៅឱ្យក្រុមគ្រួសាររបស់ពួកគេ ខណៈដំណើរការនៅបន្តដើម្បីកំណត់អត្តសញ្ញាណសាកសពចំនួន៦នាក់ទៀតដែលនៅសល់»។

រដ្ឋាភិបាលខេត្តនិយាយថា ក្នុងចំណោមអ្នកស្លាប់ទាំង១០០នាក់ មាន៦៣នាក់ជាមនុស្សពេញវ័យ និង ៣៧នាក់ជាកុមារ។ អាជ្ញាធរនិយាយថា ចំនួនអ្នកស្លាប់ទំនងជាអាចកើនឡើង ដោយសារមានអ្នកនៅតែត្រូវបានគេរាយការណ៍ថាបានបាត់ខ្លួនដោយក្រុមគ្រួសារ និងសាច់ញាតិរបស់ពួកគេ ហើយប្រតិបត្តិការស្វែងរកនៅតែបន្តធ្វើ នៅក្នុងតំបន់ដែលរងផលប៉ះពាល់។