ជម្លោះបង្ហូរឈាមរយៈពេល ១២ថ្ងៃ រវាងអ៊ីរ៉ង់ និងអ៊ីស្រាអែល បានបិទបញ្ចប់ជាផ្លូវការ កាលពីថ្ងៃអង្គារ (ទី២៤ ខែមិថុនា) ដោយភាគីទាំង២ បានចេញផ្សាយតួលេខជនរងគ្រោះដែលគូសបញ្ជាក់ពីចំនួនអ្នកស្លាប់យ៉ាងច្រើននៃអំពើហិង្សានេះ។

កាលពីថ្ងៃអង្គារ តាមរយៈប្រព័ន្ធផ្សព្វផ្សាយសង្គម លោក Hossein Kermanpour ប្រធានផ្នែកទំនាក់ទំនងសាធារណៈរបស់ក្រសួងសុខាភិបាលអ៊ីរ៉ង់ បានឲ្យដឹងថា ការវាយប្រហាររបស់អ៊ីស្រាអែល នៅទូទាំងប្រទេសអ៊ីរ៉ង់ ចាប់តាំងពីថ្ងៃទី១៣ ខែមិថុនាមក បានបណ្តាលឲ្យមានអ្នកស្លាប់ ៦១០នាក់ និងរងរបួស ៤.៧៤៦នាក់។

ក្នុងពេលជាមួយគ្នា វិទ្យុកងទ័ពអ៊ីស្រាអែល បានរាយការណ៍ថា អ៊ីរ៉ង់បានបាញ់មីស៊ីលបាលីស្ទិកពី ៥០០ ទៅ ៥៥០គ្រាប់ និងយានដ្រូនជាង ១.០០០គ្រឿង អំឡុងពេលមានជម្លោះនេះ ដោយបានសម្លាប់ជនជាតិអ៊ីស្រាអែល ២៨នាក់ និងបណ្ដាលឲ្យមានការបំផ្លិចបំផ្លាញយ៉ាងទូលំទូលាយ។

ជាមួយគ្នានេះ សេចក្ដីរាយការណ៍នោះក៏បានឲ្យដឹងផងដែរថា ការវាយប្រហារនោះ បានបំផ្លាញទីតាំងហេដ្ឋារចនាសម្ព័ន្ធរាប់សិបកន្លែង ធ្វើឲ្យផ្ទះរាប់រយខ្នងខូចខាតខ្ទេចខ្ទី និងនាំឲ្យជនស៊ីវិលជាច្រើននាក់ត្រូវបម្លាស់លំនៅ។

នៅក្នុងសុន្ទរកថាជាសាធារណៈទៅកាន់ប្រជាជាតិ កាលពីថ្ងៃអង្គារ ប្រធានាធិបតីអ៊ីរ៉ង់ លោក Masoud Pezeshkian បានប្រកាសថា ជម្លោះដែលបង្កឡើងដោយអ៊ីស្រាអែល បានបញ្ចប់ហើយ ហើយបានអំពាវនាវឲ្យភ្នាក់ងាររដ្ឋាភិបាលចាប់ផ្ដើមកិច្ចប្រឹងប្រែងភ្លាមៗឆ្ពោះទៅរកការកសាងឡើងវិញ។

ហើយនៅថ្ងៃអង្គារនោះដែរ កងកម្លាំងការពារជាតិអ៊ីស្រាអែល (IDF) បានចេញសេចក្តីថ្លែងការណ៍មួយដោយប្រាប់ថា អគ្គសេនាធិការរបស់ IDF លោក Eyal Zamir បានប្រកាសពីការផ្តោតជាយុទ្ធសាស្ត្រឡើងវិញលើតំបន់ហ្កាហ្សា ហើយឥឡូវនេះ IDF នឹងផ្តល់អាទិភាពដល់កិច្ចប្រឹងប្រែងរបស់ខ្លួន ក្នុងការជួយសង្គ្រោះចំណាប់ថ្នូរ និងលុបបំបាត់ការគ្រប់គ្រងរបស់ក្រុមហាម៉ាស នៅក្នុងតំបន់នេះ៕