ប្រព័ន្ធផ្សព្វផ្សាយរដ្ឋរបស់ទីក្រុងប៉េកាំង នៅថ្ងៃពុធ (ទី២៥ ខែមិថុនា) នេះ បានរាយការណ៍ថា ទឹកជំនន់ធំខ្លាំង នៅក្នុងខេត្ត Guizhou ភាគនិរតីនៃប្រទេសចិន បានបង្ខំឲ្យមនុស្សជាង ៨០.០០០នាក់ភៀសខ្លួនចេញពីផ្ទះសម្បែងរបស់ពួកគេ។

ប្រទេសចិនកំពុងជួបប្រទះនឹងរដូវក្តៅនៃអាកាសធាតុអាក្រក់ខ្លាំង ដោយរលកកម្ដៅហួតហែងបានគ្របដណ្ដប់ពាសពេញតំបន់ជាច្រើននៃប្រទេស ខណៈព្យុះភ្លៀងបានបក់បោកយ៉ាងសន្ធាប់លើតំបន់ផ្សេងទៀត។

ទីភ្នាក់ងារព័ត៌មានរដ្ឋ Xinhua បានរាយការណ៍ថា ក្រុមជួយសង្គ្រោះត្រូវបានបញ្ជូនទៅកាន់តំបន់ចំនួន ២ របស់ខេត្ត Guizhou ជាកន្លែងដែលការឆ្លើយតបគ្រាអាសន្នដោះស្រាយគ្រោះទឹកជំនន់ ត្រូវបានបង្កើនដល់កម្រិតខ្ពស់បំផុត។ ទីភ្នាក់ងារព័ត៌មានបានឲ្យដឹងថា ទីលានបាល់ទាត់មួយ ក្នុងតំបន់ Rongjiang ត្រូវបានជន់លិចជម្រៅ ៣ម៉ែត្រ។

សារព័ត៌មាន Xinhua បានឲ្យដឹងបន្ថែមថា មនុស្សប្រមាណជា ៨០.៩០០នាក់ ត្រូវបានជម្លៀសចេញពីផ្ទះសម្បែងរបស់ពួកគេ គិតត្រឹមរសៀលថ្ងៃទី២៤ ខែមិថុនា។ រូបភាពវីដេអូដែលបានផ្សព្វផ្សាយដោយទូរទស្សន៍រដ្ឋ CCTV កាលពីថ្ងៃទី២៤ ខែមិថុនា បានបង្ហាញឲ្យឃើញពីស្ពានបាក់ នៅជិតទីក្រុង Kaili ក្នុងខេត្ត Guizhou។

គេឃើញក្រុមអ្នកជួយសង្រ្គោះបានរុញទូកដឹកអ្នកស្រុកឆ្លងកាត់ទឹកដែលទឹកលិចដល់ក្បាលជង្គង់ ហើយក្មេងៗកំពុងរង់ចាំនៅក្នុងសាលាមត្តេយ្យ ខណៈដែលបុគ្គលិកសង្គ្រោះបន្ទាន់ បានចូលទៅកៀកពួកគេ។ រូបភាពវីដេអូពី CCTV បានបង្ហាញឲ្យឃើញក្រុមជួយសង្គ្រោះកំពុងរៀបចំយានដ្រូន ដើម្បីចែកចាយការផ្គត់ផ្គង់នានា ក្នុងនោះមានរួមទាំងអង្ករផងដែរ ដល់ជនរងគ្រោះដោយទឹកជំនន់៕