​បាល់ទាត់៖ ក្រោយ​ចែកផ្លូវ​ជាមួយ​កីឡាករ​សំខាន់ៗ​ជាច្រើន ក្លិប​បាល់ទាត់​អង្គ​រថា​យ​ហ្គឺ​របាន​ប្រកាស​ចុះ​កុងត្រា​នាំចូល​សមាជិក​ថ្មី​ដំបូង ដើម្បី​ត្រៀម​រដូវ​កាល​ថ្មីឆ្នាំ​២០២២ ខាងមុខ​ហើយគឺ​ខ្សែការពារ​កណ្ដាល​ជនជាតិ​ជប៉ុន​ Soh Narita ​ដែល​ផ្ទេរ​មកពី​ក្លិប​ Samut Prakan ​នៃ​លី​គ​ទី​៣ ថៃ។​

​ក្លិប​មាន​មូលដ្ឋាន​នៅ​ខេត្តសៀមរាប​នេះបាន​បញ្ជាក់ថា ខ្សែការពារ​កណ្ដាល​វ័យ ២៨​ឆ្នាំ​ Soh Narita ​ដ្បិត​ជា​ជនជាតិ​ជប៉ុន តែ​រូបគេ​ភាគច្រើន​ប្រកប​អាជីព​ក្រៅ​ស្រុកដូចជា​ក្លិប​ Eastern Suburbs ​នៅ​ក្របខណ្ឌ​លី​គ​កំពូល​នៃ​រដ្ឋ​មួយ​របស់​ប្រទេស​អូស្ដ្រាលី មុន​ចំណាយពេល ៣​ឆ្នាំ​នៅ​ប្រទេស​អាល្លឺម៉ង់ដោយ​ធ្លាប់​លេង​ឲ្យ ៤​ក្លិប​ផ្សេងគ្នារួមមាន​ក្លិប​ ASV Mettmann, Heiligenhaus, SC Staaken ​និង​ Düsseldorf-West ​នៅ​ក្របខណ្ឌ​លី​គ​លំដាប់​ទី​៥ និង​ទី​៦។​ ​ប៉ុន្ដែ​មុន​ផ្ទេរ​មកកាន់​ទឹកដី​ខេត្តសៀមរាប​ជាមួយ​ក្រុម​រហស្សនាម​ខ្លា​ទឹកក្រូច​ Soh Narita ​គឺ​បាន​លេង​ឲ្យ​ក្លិប​ Samut Prakan ​ដោយ​ចំណាយពេល ១​រដូវ​កាល​ពេញ​ជាមួយ​ក្លិប​ក្របខណ្ឌ​លី​គ​ទី​៣ ថៃ​នេះ។​ ថ្នាក់ដឹកនាំ​ក្រុម​អង្គ​រថា​យ​ហ្គឺ​របានបង្ហាញ​សេចក្ដីសោមនស្ស​រីករាយ ចំពោះ​វត្តមាន​ខ្សែការពារ​ជប៉ុន​រូបនេះដោយ​ពួកគេ​រំពឹង និង​ជឿជាក់​យ៉ាង​មុតមាំ​ថា វត្តមានរបស់​ Soh Narita ​នឹង​ក្លាយជា​ផ្នែក​មួយ​ដ៏​សំខាន់ ដើម្បី​ជួយ​ក្រុម​ប្រកួតប្រជែង​ក្នុង​ពានរង្វាន់​នានាក្នុង​រដូវ​កាល​ឆ្នាំ​២០២២ ខាងមុខ។​

​សូមបញ្ជាក់ថា នេះ​គឺជា​កីឡាករ​ចំណូល​ថ្មី​ដំបូងដែល​អង្គ​រថា​យ​ហ្គឺ​របាន​នាំចូល បន្ទាប់ពី​ពួកគេ​បាន​ចែកផ្លូវ​ជាមួយ​កីឡាករ​សំខាន់ៗ ៧​រូប​ជា​បន្ដបន្ទាប់កាលពី​ថ្មីៗដូចជា​កីឡាករ ឈ​ង់ ប៊ុន​ណាត​, ​ឡុង ភា​រ៉ាត់​, ​ឡុង ម៉េង​ហេង​, ​ខ្សែប្រយុទ្ធ​តុង​ហ្គា​ Ata Inia, ​ខ្សែបម្រើ​ជប៉ុន​ Kosuke Uchida, ​កីឡាករ​បេឡា​រូស​ Maksim Taleyko ​និង​ខ្សែប្រយុទ្ធ​ប្រេ​ស៊ី​ល​ Da Cruz ​រួមទាំង​គ្រូបង្វឹក​សញ្ជាតិ​អេ​ស្ប៉ា​ញ​លោក​ Orio Mohedano Segura ​ជាដើម។​ ​បច្ចុប្បន្ន​អង្គ​រថា​យ​ហ្គឺ​រកំពុង​ដឹកនាំ​ដោយ​គ្រូបង្វឹក​ថ្មី​លោក​ Alistair Heath ​អតីត​គ្រូបង្វឹក​ក្រុមយុវជន​ក្លិប​ Leicester City ​ហើយ​ក្រៅពី​កីឡាករ​ Soh Narita ​គ្រូបង្វឹក​សញ្ជាតិ​អង់គ្លេស​រូបនេះ​​ក៏​កំពុង​សម្លឹង​រក​កីឡាករ​ល្អៗ ទាំង​កីឡាករ​ក្នុងស្រុក និង​កីឡាករ​បរទេសដើម្បី​ពង្រឹង​ក្រុម​ត្រៀម​រដូវ​កាល​ថ្មី​ខាងមុខ​ផងដែរ៕

​អត្ថបទ លី ឈុន​ឡា​, រូបភាព​ពាក់ព័ន្ធ ៕