អគ្គលេខាធិការរងអង្គការសហប្រជាជាតិ (UN) ទទួលបន្ទុកកិច្ចការនយោបាយ លោកស្រី Rosemary DiCarlo កាលពីថ្ងៃអង្គារ បានអំពាវនាវឲ្យមានការទូត និងកិច្ចសន្ទនា ដើម្បីធានាឲ្យបានសន្តិភាពនៃកម្មវិធីនុយក្លេអ៊ែររបស់អ៊ីរ៉ង់។

នៅក្នុងសេចក្ដីសង្ខេបទៅកាន់ក្រុមប្រឹក្សាសន្តិសុខ ស្តីពីការអនុវត្តសេចក្ដីសម្រេចលេខ ២២៣១ ដែលគាំទ្រកិច្ចព្រមព្រៀងនុយក្លេអ៊ែរឆ្នាំ២០១៥ រវាងអ៊ីរ៉ង់ និងមហាអំណាចទាំង ៦ ដែលរួមមានអង់គ្លេស ចិន បារាំង អាល្លឺម៉ង់ រុស្ស៊ី និងសហរដ្ឋអាមេរិក លោកស្រី DiCarlo បង្ហាញការសោកស្តាយដែលនៅសល់មិនដល់ ៤ខែទៀតបទប្បញ្ញត្តិនេះត្រូវបញ្ចប់ ខណៈដែលកិច្ចព្រមព្រៀងនុយក្លេអ៊ែរអ៊ីរ៉ង់មិនទាន់បានសម្រេចទាំងស្រុងនៅឡើយ។ សេចក្ដីសម្រេចលេខ ២២៣១ ផុតកំណត់នៅថ្ងៃទី១៨ ខែតុលា ឆ្នាំ២០២៥។

លោកស្រី DiCarlo បាននិយាយថា កិច្ចព្រមព្រៀងនុយក្លេអ៊ែរដែលត្រូវបានអនុម័តកាលពីរដូវក្តៅឆ្នាំ២០១៥ ដើម្បីធានាថា កម្មវិធីនុយក្លេអ៊ែររបស់អ៊ីរ៉ង់ នឹងមានសន្តិភាពទាំងស្រុងនោះ បានប្រឈមនឹងបញ្ហាជាច្រើន ចាប់តាំងពីដើមដំបូង ក្នុងនោះរួមទាំងការដកខ្លួនរបស់សហរដ្ឋអាមេរិកចេញពីកិច្ចព្រមព្រៀងនេះ ក្នុងឆ្នាំ២០១៨ អំឡុងអាណត្តិដំបូងរបស់លោក Donald Trump ជាប្រធានាធិបតីអាមេរិក។

លោកស្រីបានបញ្ជាក់ថា៖ «បន្ទាប់ពីមានការប៉ះទង្គិចគ្នាយ៉ាងអាក្រក់ ក្នុងរយៈពេល ១២ថ្ងៃកន្លងមក រវាងអ៊ីរ៉ង់ និងអ៊ីស្រាអែល កិច្ចព្រមព្រៀងបទឈប់បាញ់ គឺជាឱកាសមួយ ដើម្បីបញ្ចៀសការកើនឡើងនូវមហន្តរាយ ហើយសម្រេចបាននូវដំណោះស្រាយដោយសន្តិវិធីនៃបញ្ហានុយក្លេអ៊ែរអ៊ីរ៉ង់។ ការទូត ការសន្ទនា និងការផ្ទៀងផ្ទាត់ នៅតែជាជម្រើសដ៏ល្អបំផុត ដើម្បីធានានូវការមានសន្តិភាពទាំងស្រុងនៃកម្មវិធីនុយក្លេអ៊ែររបស់អ៊ីរ៉ង់ និងដើម្បីនាំមកនូវផលប្រយោជន៍សេដ្ឋកិច្ចជាក់ស្តែង សម្រាប់ប្រជាជនអ៊ីរ៉ង់»៕