ប្រមុខសិទ្ធិមនុស្សរបស់អង្គការសហប្រជាជាតិ (UN) កាលពីថ្ងៃអង្គារ (ទី២៤ ខែមិថុនា) បានជំរុញប្រទេសស្រីលង្កាធានាឲ្យមានការផ្ដន្ទាទោស ចំពោះអ្នកត្រូវទទួលខុសត្រូវ ពាក់ព័ន្ធនឹងការប្រព្រឹត្តិឧក្រិដ្ឋកម្ម អំឡុងសង្គ្រាមជនជាតិភាគតិចដែលមានរយៈពេលយ៉ាងយូរ។

អំឡុងកិច្ចពិភាក្សា នៅក្នុងរដ្ឋធានីកូឡុំបូរបស់ប្រទេសស្រីលង្កា លោក Volker Turk បានប្រាប់ថា ប្រទេសនេះត្រូវតែដោះស្រាយបញ្ហា ពាក់ព័ន្ធនឹងនិទណ្ឌភាព ក្នុងអំឡុងពេលមានសង្រ្គាមបំបែករដ្ឋតាមិល (Tamil) ដែលចុងក្រោយត្រូវបានបញ្ចប់ដោយការបង្ហូរឈាម ក្នុងឆ្នាំ២០០៩។

UN បានប៉ាន់ប្រមាណថា ជនស៊ីវិលតាមិលចំនួន ៤០.០០០នាក់ ត្រូវបានសម្លាប់ដោយកងកម្លាំងរដ្ឋាភិបាល នៅប៉ុន្មានខែចុងក្រោយនៃការប្រយុទ្ធ ដើម្បីកម្ចាត់ក្រុមឧទ្ទាមខ្លាតាមិល (Tamil Tiger) ដែលបានធ្វើសង្គ្រាម ដើម្បីឯករាជ្យ។

រដ្ឋាភិបាលស្រីលង្កាជាបន្តបន្ទាប់ បានប្រឆាំងនឹងការអំពាវនាវឲ្យមានការស៊ើបអង្កេតឯករាជ្យ ដែលគាំទ្រដោយអន្តរជាតិ ចំពោះការរំលោភសិទ្ធិដ៏គួរឲ្យតក់ស្លុត ខណៈដែលការសម្លាប់ដ៏លេចធ្លោជាច្រើនករណីលើជនស៊ីវិល នៅតែមិនទាន់ដោះស្រាយបាន។

លោក Turk បាននិយាយថា បច្ចុប្បន្ន ប្រទេសស្រីលង្កាកំពុងជាប់ក្នុង «បញ្ហានិទណ្ឌភាព» ខណៈដែលប្រទេសនេះ បានងើបចេញពីការដួលរលំសេដ្ឋកិច្ចនៅឆ្នាំ២០២២។

លោកបានលើកឡើងថា៖ «វាគឺជាការសំខាន់ណាស់ ក្នុងការផ្ដន្ទាទោសជនល្មើសដែលបានប្រព្រឹត្តឧក្រិដ្ឋកម្មធ្ងន់ធ្ងរបំផុត។ ការធ្វើបែបនេះ គឺមានសារៈសំខាន់ សម្រាប់អំពើយុត្តិធម៌ មានសារៈសំខាន់ សម្រាប់ការរារាំងទប់ស្កាត់ មានសារៈសំខាន់ សម្រាប់ជនរងគ្រោះដែលបានទទួលរងការឈឺចាប់ និងការបាត់បង់ដែលមិនអាចនឹកស្មានដល់ ហើយនិងមានសារៈសំខាន់ សម្រាប់អនាគតរបស់ប្រទេស»៕