មានកាំជ្រួចលម្អចម្រុះពណ៌ ពិធីជួបជុំគ្នាសប្បាយអមដោយស្រាសំប៉ាញ និងគ្រាប់មីស៊ីលបាលីស្ទីក ហោះកាត់យូរៗម្តងពីខាងលើបារ៍ និងក្លិបរាត្រី នៅក្នុងប្រទេសលីបង់ នៅពេលយប់ កាលពីសប្តាហ៍មុន ខណៈដែលអ៊ីរ៉ង់ និង   អ៊ីស្រាអែល បានបាញ់មីស៊ីលដាក់គ្នាទៅវិញទៅមក ដោយបានធ្វើអ្នកទស្សនាសម្តែងការព្រួយបារម្ភ និងហួសចិត្តជាពន់ពេក។

ប្រព័ន្ធផ្សព្វផ្សាយសង្គម សម្បូរទៅដោយនឹងវីដេអូនៃយុវជនបង្ហាញក្តីរីករាយរបស់ពួកគេ ខណៈដែលគ្រាប់មីស៊ីលហោះខ្វាត់ខ្វែងពេញេផ្ទៃមេឃនៅពេលយប់។  ភាពលាយឡំគ្នានៃរឿងល្អៗ និងភាពធន់ចំពោះស្ថានភាពដ៏មហន្តរាយ បានបង្ហាញក្តីប្រាថ្នាយ៉ាងជ្រាលជ្រៅ ក្នុងចំណោមជនជាតិលីបង់ ដើម្បីធ្វើយ៉ាងណាឲ្យរួចផុតវដ្តនៃជម្លោះដែលគ្មានទីបញ្ចប់នេះ។

លោក Jean Beiruti អគ្គលេខាធិការនៃសហភាពទេសចរណ៍ បានប្រាប់សារព័ត៌មាន Arab News ថា៖  «ប្រជាជនលីបង់ ចូលចិត្តប្រារព្ធកម្មពិធីសប្បាយៗ ជាមធ្យោបាយមួយនៃការប៉ះប៉ូវសម្រាប់វិបត្តិទាំងអស់ ដែលពួកគេបានស៊ូទ្រាំ ជាយូរមកហើយនោះ។

«ប្រហែលជាភ័ស្តុតាងច្បាស់លាស់បំផុតនៃរឿងនេះ គឺឃ្លីបខ្លីៗនៃពិធីជប់លៀងអាពាហ៍ពិពាហ៍ និងការជួបជុំគ្នា ក្នុងក្លិបរាត្រី បើទោះបីជាមានគ្រាប់មីស៊ីល បានហោះកាត់ពេញផ្ទៃមេឃនៃប្រទេសលីបង់ក្តី។

រដូវក្តៅនេះ គឺសំដៅលើដំណើរការវិលទៅរកសភាពដើមឡើងវិញសម្រាប់ប្រទេសលីបង់ ដែលជាក្តីសង្ឃឹមដ៏ភ្លឺស្វាង បន្ទាប់ពីការដួលរលំសេដ្ឋកិច្ច និងភាពជាប់គាំងផ្នែកនយោបាយជាច្រើនឆ្នាំមកនោះ។

ប្រធានាធិបតីថ្មី និងនាយករដ្ឋមន្ត្រី ដែលមិនរងការប៉ះពាល់ពីអំពើពុករលួយរបស់អ្នកកាន់អំណាចមុនៗ បានឡើងកាន់តំណែង។ ក្រុមហេសបូឡា ជាក្រុមប្រដាប់អាវុធដ៏មានឥទ្ធិពលដែលគាំទ្រដោយអ៊ីរ៉ង់ បានចុះខ្សោយយ៉ាងធ្ងន់ធ្ងរ បន្ទាប់ពីសង្គ្រាមដ៏បំផ្លិចបំផ្លាញជាមួយអ៊ីស្រាអែល។