នាយករដ្ឋមន្ត្រីអ៊ីរ៉ាក់លោក Mohammed Shia' al-Sudani និងព្រះអង្គម្ចាស់អារ៉ាប៊ីសាអ៊ូឌីត Mohammed bin Salman Al Saud កាលពីថ្ងៃអង្គារ បានសង្កត់ធ្ងន់ពីតម្រូវការ ដើម្បីទប់ស្កាត់ការកើនឡើងនៃជម្លោះនិងសកម្មភាពយោធា។ នេះបើយោងតាមសេចក្តីថ្លែងការណ៍របស់ការិយាល័យប្រព័ន្ធផ្សព្វផ្សាយរបស់លោក al-Sudani។

មេដឹកនាំទាំងពីរ បានសន្ទនាតាមទូរស័ព្ទ ក្នុងអំឡុងពេលដែលពួកគេបានពិភាក្សាអំពីទំនាក់ទំនងទ្វេភាគី និងការវិវឌ្ឍថ្មីៗក្នុងតំបន់។

សេចក្តីថ្លែងការណ៍ បានឲ្យដឹងថា ពួកគេបានគូសបញ្ជាក់ពីសារៈសំខាន់នៃការអនុវត្តការអត់ធ្មត់ ផ្តល់អាទិភាពដល់ការសន្ទនា និងការបញ្ឈប់ការបន្តមិនយកចិត្តទុកដាក់ចំពោះច្បាប់ និងសេចក្តីសម្រេចអន្តរជាតិ។

ភាគីទាំងពីរ បានសង្កត់ធ្ងន់លើតួនាទីដ៏សំខាន់របស់ទីភ្នាក់ងារអន្តរជាតិ និងអង្គការសហប្រជាជាតិ ក្នុងការកាត់បន្ថយភាពតានតឹង និងការស្តារស្ថិរភាពឡើងវិញ។

ការសន្ទនារបស់ពួកគេ បានកើតឡើង នៅពេលដែលបទឈប់បាញ់រវាងអ៊ីស្រាអែល និងអ៊ីរ៉ង់ ចូលជាធរមានកាលពីថ្ងៃអង្គារ បន្ទាប់ពីការវាយប្រហារតាមអាកាសទ្រង់ទ្រាយធំរបស់អ៊ីស្រាអែល លើទីតាំងជាច្រើន នៅក្នុងប្រទេសអ៊ីរ៉ង់ កាលពីថ្ងៃទី ១៣ ខែមិថុនា ដែលបានសម្លាប់មេបញ្ជាការជាន់ខ្ពស់ អ្នកវិទ្យាសាស្ត្រនុយក្លេអ៊ែរ និងជនស៊ីវិល។ ជាការសងសឹក អ៊ីរ៉ង់បានបើកការវាយប្រហារដោយមីស៊ីល និងយានដ្រូន ជាច្រើនលើក ទៅលើអ៊ីស្រាអែល ដែលបានបណ្តាលឲ្យមានអ្នកស្លាប់និងរបួស និងការខូចខាតគួរឲ្យកត់ សម្គាល់។