ធនាគារពិភពលោក(WB)នៅថ្ងៃពុធនេះ បានប្រកាសថា ខ្លួនបានអនុម័តគម្រោងថវិកាចំនួន ២៥០ លានដុល្លារ ដើម្បីគាំទ្រដល់ការកសាងឡើងវិញ និងការស្តារឡើងវិញរបស់ប្រទេសលីបង់ បន្ទាប់ពីសង្គ្រាមបំផ្លិចបំផ្លាញកាលពីឆ្នាំមុន រវាងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់។

ធនាគារនេះ ធ្លាប់បានប៉ាន់ប្រមាណការកសាងឡើងវិញនិងការស្តារឡើងវិញថា នឹងចំណាយប្រាក់ប្រហែល ១១ ពាន់លានដុល្លារ។

ក្រុមប្រឹក្សានាយកប្រតិបត្តិរបស់ធនាគារពិភពលោកកាលពីថ្ងៃអង្គារ បានអនុម័តហិរញ្ញប្បទានចំនួន ២៥០លានដុល្លារ ដល់ប្រទេសលីបង់ ដើម្បីគាំទ្រការជួសជុលជាបន្ទាន់បំផុត និងការកសាងឡើងវិញនូវហេដ្ឋារចនាសម្ព័ន្ធសាធារណៈសំខាន់ៗ និងសេវាសំខាន់ៗដែលខូចខាត និងការគ្រប់គ្រងប្រកបដោយនិរន្តរភាពនូវបំណែកថ្មនៅក្នុងតំបន់ ដែលរងផលប៉ះពាល់ដោយជម្លោះនេះ។

លោក Jean-Christophe Carret ប្រធានសាខារបស់ធនាគារពិភពលោកប្រចាំមជ្ឈិមបូព៌ា បាននិយាយថា៖«ដោយសារតម្រូវការសាងសង់ឡើងវិញដ៏ធំរបស់ប្រទេសលីបង់ គម្រោងនេះ ត្រូវបានរៀបចំឡើងជាក្របខ័ណ្ឌ ដែលមានទំហំទឹកប្រាក់ចំនួន មួយពាន់លានដុល្លារ ជាមួយនឹងវិភាគទានដំបូងចំនួន ២៥០ លានដុល្លារ ពីធនាគារនេះ។

នាយករដ្ឋមន្ត្រីលីបង់ លោក Nawaf Salam បានសាទរចំពោះការសម្រេចចិត្តនេះ ដោយបានហៅគម្រោងនេះថា «ជាជំហានសំខាន់ក្នុងការកសាងឡើងវិញ ដោយឆ្លើយតបទៅនឹងការខូចខាតដល់ហេដ្ឋារចនាសម្ព័ន្ធសំខាន់ៗ និងសេវាកម្មចំាបាច់នានា នៅក្នុងតំបន់ដែលរងផលប៉ះពាល់ដោយសង្រ្គាម»។

លោកបានបន្តថា៖ «ការគាំទ្រនេះ ពង្រឹងកិច្ចខិតខំប្រឹងប្រែងស្តារឡើងវិញក្នុងក្របខ័ណ្ឌការអនុវត្តដែលដឹកនាំដោយរដ្ឋ និងប្រើប្រាស់ហិរញ្ញប្បទានបន្ថែមដែលត្រូវការយ៉ាងច្រើន»។