ជនប៉ាឡេស្ទីននៅទីក្រុងហ្កាហ្សា បានបង្ហាញនូវក្តីបារម្ភរបស់ពួកគេ ពេលដែលកងកម្លាំងអ៊ីស្រាអែល បានបញ្ជាឲ្យជម្លៀសខ្លួនជាថ្មី ។

យោធាអ៊ីស្រាអែល បានទម្លាក់ខិតប័ណ្ណនៅតាមតំបន់ជាច្រើននៅភាគខាងជើងហ្កាហ្សា បញ្ជាឲ្យអ្នកស្រុកចាកចេញពីផ្ទះសម្បែងរបស់ពួគគេ រួចធ្វើដំណើរទៅភាគខាងត្បូង ដែលទំនងជាយោធាអ៊ីស្រាអែលបើកការវាយប្រហារថ្មីលើក្រុមហាម៉ាស់ ។

លោក Abu Ahmed គឺជាជនប៉ាឡេស្ទីនមួយរូប និយាយថា តើកន្លែងណាដែលពួកយើងត្រូវជម្លៀសទៅនោះ? រាល់ថ្ងៃ ផែនទីជម្លៀសថ្មី ត្រូវបានបញ្ជូននៅទីក្រុង Jabalia ទីក្រុង Tuffah តើកន្លែងណាទៅដែលពួកយើងគួរទៅនោះ? តើកន្លែងណា? ពួកយើងចង់ស្លាប់ជាជាងនៅរស់ ។

ពេលបង្ហាញបទបញ្ជាជម្លៀសខ្លួននៅលើទូរស័ព្ទដៃរបស់គាត់ឲ្យធ្វើដំណើរទៅកាន់ជំរំ al-Mawasi ស្ថិតក្នុងទីក្រុង Khan Younis លោក Ahmed និយាយថា លោកពិតជាមានការហត់នឿយខ្លាំងណាស់ចំពោះការបញ្ជាឲ្យជម្លៀសខ្លួនបែបនេះ ។

ក្រុមគ្រូពេទ្យបឋម និងក្រុមអ្នកស្រុក និយាយថា ជនប៉ាឡេស្ទីនយ៉ាងហោច ៤០នាក់ ត្រូវបានសម្លាប់នៅតំបន់ហ្កាហ្សាកាលពីថ្ងៃអង្គារ នៅក្នុងការបង្ហូរឈាមបន្ថែមទៀត ភ្លាមៗ ក្រោយអ៊ីស្រាអែល និងអ៊ីរ៉ង់យល់ព្រមបទឈប់បាញ់នៅក្នុងសង្រ្គាមតាមច្រកអាកាសរបស់ពួកគេ ៕