ប្រភពវេជ្ជសាស្ត្របានប្រាប់សារព័ត៌មាន Al Jazeera ថា ការវាយប្រហាររបស់អ៊ីស្រាអែលបានសម្លាប់មនុស្សយ៉ាងហោចណាស់ ៧៨ នាក់នៅតំបន់ហ្កាហ្សាស្ទ្រីបចាប់តាំងពីព្រឹកព្រលឹម រួមទាំងជនជាតិប៉ាឡេស្ទីន ១៤ នាក់ដែលកំពុងរង់ចាំនៅជិតមជ្ឈមណ្ឌលចែកចាយជំនួយ។

លោកប្រធានាធិបតី Donald Trump កាលពីថ្ងៃពីពុធសប្ដាហ៍នេះដែរ បាននិយាយថាវឌ្ឍនភាពកំពុងកើតមានដើម្បីបញ្ចប់សង្គ្រាមរវាងអ៊ីស្រាអែល និងក្រុមហាម៉ាសនៅដែនដីហ្កាហ្សា ខណៈមានការជំរុញឲ្យមានបទឈប់បាញ់ថ្មីមួយបានចាប់ផ្ដើម ជាង២០ខែចាប់តាំងពីជម្លោះបានផ្ទុះឡើង។

ប្រភពនៅមន្ទីរពេទ្យ al-Awda និងអាល់អាកសាម៉ាធ័រ(Al-Aqsa Martyrs) នៅទីក្រុង ហ្កាហ្សា បានប្រាប់សារព័ត៌មាន Al Jazeera ថាយ៉ាងហោចណាស់ជនជាតិប៉ាឡេស្ទីន ៩ នាក់ត្រូវបានសម្លាប់ និងជាច្រើននាក់ទៀតបានរងរបួសដោយសារការបាញ់ប្រហាររបស់អ៊ីស្រាអែលកាលពីព្រឹកថ្ងៃពុធសប្ដាហ៍នេះ ស្របពេលកំពុងរង់ចាំជំនួយនៅជិតផ្លូវបំបែក Netzarim នៅកណ្តាលដែនដីហ្កាហ្សា។ 

ការស្លាប់នេះគឺជារលកចុងក្រោយនៃអំពើហិង្សានៅជិតចំណុចចែកចាយជំនួយដែលត្រូវបានបង្កើតឡើងកាលពីចុងខែមុនដោយមូលនិធិមនុស្សធម៌តំបន់ហ្កាហ្សាគាំទ្រដោយសហរដ្ឋអាមេរិក និងអ៊ីស្រាអែល ដែលក្រុមអ្នករិះគន់បានលើកឡើងថាជា "កន្លែងសត្តឃាតមនុស្ស" និង "អន្ទាក់មរណៈ" ។

មូលនិធិមនុស្សធម៌តំបន់ហ្កាហ្សា បានរងការរិះគន់យ៉ាងខ្លាំងពីទីភ្នាក់ងារផ្តល់ជំនួយ និងអង្គការសហប្រជាជាតិ ដែលនិយាយថាក្រុមនេះមិនអាចបំពេញតម្រូវការរបស់ប្រជាជន និងប្រែក្លាយអាហារទៅជាអាវុធសម្រាប់អ៊ីស្រាអែលដើម្បីធ្វើប្រតិបត្តិការយោធារបស់ខ្លួន៕