ទូរទស្សន៍រដ្ឋបានរាយការណ៍ថា សមាជិកសភាអ៊ីរ៉ង់បានបោះឆ្នោតកាលពីថ្ងៃពុធ ទី២៥ មិថុនា ដើម្បីគាំទ្រការផ្អាកកិច្ចសហប្រតិបត្តិការជាមួយអង្គការឃ្លាំមើលនុយក្លេអ៊ែររបស់អង្គការសហប្រជាជាតិ បន្ទាប់ពីសង្គ្រាមរយៈពេល១២ថ្ងៃ ដែលបានឃើញអ៊ីស្រាអែល និងសហរដ្ឋអាមេរិក វាយប្រហារទៅលើរោងចក្រនុយក្លេអ៊ែររបស់ខ្លួន។

ទូរទស្សន៍រដ្ឋនិយាយថា ប្រធានសភាអ៊ីរ៉ង់ លោក Mohammad Bagher Ghalibaf បាននិយាយថា «ទីភ្នាក់ងារថាមពលអាតូមិកអន្តរជាតិ (IAEA) បដិសេធមិនព្រមថ្កោលទោសខ្លាំងក្លាលើការវាយប្រហារលើរោងចក្រនុយក្លេអ៊ែររបស់អ៊ីរ៉ង់ ដោយធ្វើឲ្យកេរ្ត៍ឈ្មោះជាអន្តរជាតិរបស់ស្ថាប័ននេះ ដែលត្រូវបានមើលឃើញថាលំអៀងទៅខាងអ្នកមានឥទ្ធិពល» ។



ការសម្រេចនៅតែទាមទារការយល់ព្រមពីក្រុមប្រឹក្សាការពារ ដែលជាស្ថាប័នផ្តល់សិទ្ធិអំណាចដើម្បីពិនិត្យច្បាប់។ លោក Ghalibaf បាននិយាយថា ប្រសិនបើវាត្រូវបានផ្តល់សច្ចាប័ន «អង្គការថាមពលអាតូមិករបស់អ៊ីរ៉ង់ នឹងផ្អាកកិច្ចសហប្រតិបត្តិការរបស់ខ្លួនជាមួយទីភ្នាក់ងារ IAEA រហូតដល់សន្តិសុខនៅរោងចក្រនុយក្លេអ៊ែរត្រូវបានធានា»។

នៅក្នុងសភា សមាជិកចំនួន២២១រូបបានបោះឆ្នោតគាំទ្រ និងមួយរូបបានអនុប្បវាទ ដោយគ្មានសំឡេងប្រឆាំងពីអ្នកដែលមានវត្តមាននៅក្នុងសភាដែលមាន២៩០អាសនៈ នេះបើយោងតាមទូរទស្សន៍រដ្ឋ។ សមាជិកសភា លោក Alireza Salimi បាននិយាយថា ការផ្អាកកិច្ចសហប្រតិបត្តិការនឹងមានន័យថា ក្រុមអធិការកិច្ចរបស់ទីភ្នាក់ងារ IAEA នឹងត្រូវបានរារាំងមិនឱ្យចូលទៅកាន់ទីតាំងនុយក្លេអ៊ែរ លុះត្រាតែពួកគេទទួលបានការយល់ព្រមពីស្ថាប័នសន្តិសុខជាន់ខ្ពស់របស់អ៊ីរ៉ង់ ជាក្រុមប្រឹក្សាសន្តិសុខជាតិជាន់ខ្ពស់។